Elimizdegi elektr stantsııalaryna qatysty tehnıkalyq aýdıt aıaqtaldy

ASTANA. QazAqparat – Qazaqstan aýmaǵyndaǵy 55 elektr stantsııasynyń tehnıkalyq jaǵdaıyna qatysty aýdıt júrgizildi. Bul týraly Energetıka vıtse-mınıstri Jandos Nurmaǵanbetov aıtty, dep habarlaıdy QazAqparat tilshisi.

«2022 jyldan KPMG bastaǵan halyqaralyq sarapshylar toby Dúnıejúzilik banktiń qoldaýymen elimizdiń elektr stantsııalaryna aýqymdy tehnıkalyq aýdıt júrgizdi. Jalpy 55 elektr stantsııasy zertteldi. Jylý berý stantsııalarynyń negizgi ári qosalqy jabdyqtarynyń tehnıkalyq jáne ony paıdalaný jaǵdaıyna erekshe nazar aýdaryldy. Tekserý qorytyndysy boıynsha stantsııalar tehnıkalyq jaı-kúıine, paıdalaný merzimine, otyn shyǵyny kórsetkishine, apattyq jaǵdaıyna, mamandardy qamtý jáne jóndeý jumystaryn oryndaýǵa qatysty sanattar boıynsha jikteldi», - dedi J. Nurmaǵambetov Ortalyq kommýnıkatsııalar qyzmetindegi baspasóz máslıhatynda.

Onyń aıtýynsha, maýsym aıynyń sońyna qaraı tehnıkalyq qyzmet kórsetý, stantsııalardy odan ári paıdalaný turǵysynda tıisti jumystardy qamtı otyryp, ár stantsııa boıynsha egjeı-tegjeıli is-sharalar jospary daıyndalady.

«Bul rette mınıstrlik «tarıfti ınvestıtsııalarǵa aıyrbastaý» jańartylǵan baǵdarlamasyn iske asyrýǵa kiristi. Onyń aıasynda generatsııa sektorynyń ınvestıtsııalyq tartymdylyǵyn arttyrý arqyly saladaǵy jabdyqtaryń tozý deńgeıin keminde 15% - ǵa tómendetý eskerilgen. Jańartylǵan baǵdarlamanyń mańyzdy bóligi - qoldaý tetikterin jetildirý men kásiporyndardyń keri mindettemelerin kúsheıtý. Qazirgi kezde mınıstrlik berilgen ótinimderge sáıkes 47 energııa óndirýshi uıymnyń 27-si úshin elektr energııasyna shekti tarıfterdi túzetti. Olardyń tarıfteriniń ortasha ósýi shamamen 24 paıyzdy qurady», - dedi vıtse-mınıstr.