Elimizdegi elektr energetıkasyn damytýǵa odan ári jaǵdaı jasaıtyn zań jobasy birinshi oqylymda maquldandy
ASTANA. 11 qańtar. QazAqparat /Qanat Mámetqazyuly/ - Búgin QR Parlamenti Senatynyń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine elektr energetıkasy,
tabıǵı monopolııalar men retteletin naryq sýbektileriniń ınvestıtsııalyq qyzmeti máseleleri boıynsha tolyqtyrýlar men ózgerister engizý týraly zań jobasyn birinshi oqylymda maquldady.
Atalǵan zań jobasy energetıka, tabıǵı monopolııalar jáne retteletin naryq sýbektileriniń ınvestıtsııalyq qyzmeti, sondaı-aq elektro energetıkasyn odan ári damytý úshin qolaıly jaǵdaı jasaý máseleleri jónindegi zańnamalyq bazany jetildirý maqsatynda ázirlengen. Zań jobasymen ákimshilik quqyq buzýshylyq týraly kodeksine elektr energııasyn jáne elektr qýatynyń ázirligin qoldaý jónindegi qyzmet kórsetýlerdi satý tártibin buzǵandyǵy úshin jaýaptylyq belgilenedi. Budan bólek energııa óndirýshi uıymnyń ınvestıtsııalarynyń kólemi men baǵyttary, ınvestıtsııalyq mindettemelerdi oryndaý týraly málimetterdi buqaralyq aqparat quraldaryna ýaqytyly durys nemese tolyq jarııalamaǵany úshin jaýapkershilik belgilenedi. Investıtsııalyq baǵdarlamalardy bekitý, sondaı-aq tabıǵı monopolııalar sýbektileriniń olardy oryndaý máselelerin retteý maqsatynda ınvestsııalyq baǵdarlamalardy jáne olardyń iske asyrylýy týraly esepterdi taldaýdy bekitý tártibi retteledi. Bul rette tabıǵı monopolııa sýbektileriniń ınvestıtsııalyq baǵdarlamalardy oryndamaǵan kezde ıgerilmegen qarajatty tutynýshylarǵa qaıtarý mindeti júkteledi. Sonymen qatar ınvestıtsııalyq baǵdarlamalardyń ashyqtyǵyn qamtamasyz etýdi, baǵany tómendetý, ıgerilmegen qarajatty tutynýshylarǵa qaıtarý jónindegi mindettemelerdi engizý arqyly ınvestıtsııalar salý kepildemelerin qamtý qarastyrylady.
Birinshi oqylymda maquldanǵan zań jobasy Bas komıtetke ekinshi oqylymdy ázirleý úshin tapsyrylady.
