Elimizdegi eki jetekshi orkestrdiń mýzykalyq aspaptary jańartyldy

ASTANA. QazAqparat - Qurmanǵazy atyndaǵy ulttyq halyq aspaptary jáne N.Tilendıev atyndaǵy «Otyrar sazy» orkestrleriniń aspaptary jańartyldy, dep habarlaıdy QazAqparat Mádenıet jáne sport mınıstrligine silteme jasap.

Qurmanǵazy atyndaǵy Qazaq ulttyq halyq aspaptary orkestriniń aldaǵy 90 jyldyǵy jáne Nurǵısa Tilendıev atyndaǵy akademııalyq folklorly-etnografııalyq «Otyrar sazy» orkestriniń 40 jyldyq mereıtoıyna oraı eki orkestrge 40 dombyra tartý etildi.

«Bıyl biz shyǵarmashylyq ujymdarmen kóptegen kezdesýler ótkizdik. Ashyq dıalog barysynda kóterilgen basty máselelerdiń biri – mýzykalyq aspaptardy jańartý jáne satyp alý qajettiligi. Bul kóp kúttirmeı sheshýdi qajet etetin qordalanǵan másele boldy. Sondyqtan biz demeýshilik qarajat esebinen bul jumysty qolǵa alý týraly sheshim qabyldadyq. Birden sheber Jolaýshy Turdyǵulovqa 40 dombyra jasattyq. Búgin sol dombyralardy ózderińizge tabystap otyrmyz. Osy jobanyń iske asýyna demeý kórsetip, atsalysqan barsha azamatqa alǵys aıtamyn», – dedi Dáýren Abaev.

Dombyralar kásipker jáne metsenat Tımýr Turlovtyń jeke qarajaty esebinen satyp alyndy.