Elimizdegi eki dıstrıbıýtor amerıkalyq fılmderdi prokattaýǵa múddeli
NUR-SULTAN. QazAqparat - Berlınde ótken kıno baıqaýda elimizde túsirilgen kartınalardy kórsetip qana qoımaı, satý da qolymyzdan keldi. Bul týraly «Ulttyq kınony qoldaý ortalyǵy» kommertsııalyq emes aktsıonerlik qoǵamynyń qyzmetine arnalǵan baspasóz konferentsııasynda aıtyldy, dep habarlaıdy QazAqparat tilshisi.
«Bizdiń ortalyq qaraıtyn taǵy bir másele - ózimiz qarjylandyratyn fılmderdi dıstrıbıýbıtsııalaý. Atalǵan memlekettik ortalyq arqyly dıstrıbıýtorlyq júıe qurýymyz qajet. Ol elimizdegi kınoprokatta úshinshi oıynshy bolýy kerek. Qazir bizde eki dıstrıbıýter bar, onyń biri - Sulpak Sinema bolsa, ekinshisi - Meloman. Olar amerıkalyq kınostýdııalardyń ókili bolyp sanalady, sol sebepti olar sol jaqtyń fılmderin prokattaýǵa múddeli», - deıdi «Ulttyq kınony qoldaý memlekettik ortalyǵynyń» basqarma tóraıymy Gúlnar Sársenova.
Ol Ulttyq kınony qoldaý memlekettik ortalyǵy otandyq fılmderdi amerıkalyq nemese eýropalyq fılmdermen bir deńgeıde ekranǵa shyǵarýdy maqsat tutatynyn aıtty.
«Biz mán beretin taǵy bir baǵyt - básekege qabiletti kıno salasyn qalyptastyryp, halyqaralyq dárejede seriktes bolý. Bizdiń ortalyq 2020 jyly otandyq fılmderdi halyqaralyq eń iri bes baıqaýǵa qatystyrady. Biz birinshi ret Berlın kıno baıqaýyna qatystyq. 8 kún ishinde 150 kezdesý boldy. Biz elimizde túsirilgen kartınalardy kórsetip qana qoımaı, satý da qolymyzdan keldi», - deıdi ol.
