Elimizdegi donor azdyǵy adam ómirin saqtap qalýǵa kedergi bolyp otyr – dárigerler

ASTANA. QazAqparat – Parlament Senatynyń depýtattary Nurlan Beknazarov pen Aıgúl Qapbarova Shymkent qalasyndaǵy júrek aýrýlaryn emdeıtin ortalyqta boldy. Bul uıym – 20 jyldan astam ýaqyt jumys istep kele jatqan eldiń ońtústik aımaǵyndaǵy jetekshi klınıka, dep habarlaıdy QazAqparat Senattyń baspasóz qyzmetine silteme jasap.

Kezdesý barysynda medıtsınalyq mekeme ókilderi senatorlarǵa klınıkanyń qyzmeti týraly habardar etti jáne otandyq medıtsınanyń qazirgi deńgeıi búırek, baýyr, júrek, ókpe, uıqy bezin transplantatsııalaýǵa múmkindik beretinin atap ótti.

Dárigerler sonymen qatar Qazaqstandaǵy donorlardyń azdyǵy medıtsınalyq transplantatsııany damytý men adamdardyń ómirin saqtap qalýǵa kedergi bolyp kele jatqanynyna nazar aýdardy. Bul máseleniń syndarly jáne zańnamalyq turǵyda sheshimi tabylýy kerek.

Senator Aıgúl Qapbarova donorlar tapshylyǵy shyn máninde kúrdeli jaǵdaı ekenine toqtala kelip, mundaı mańyzdy máseleler Parlament Senatynda da jan-jaqty zerdelenetinin atap ótti. Al Nurlan Beknazarov medıtsına salasyndaǵy ózekti máseleler árqashan parlamentshilerdiń erekshe baqylaýynda ekenin atap ótti.

«Parlament Senaty densaýlyq saqtaý salasyn damytýǵa erekshe nazar aýdaryp otyrady. Jyl saıyn respýblıkalyq bıýdjetti jasaqtaý kezinde densaýlyq saqtaýǵa bólinetin qarjynyń jetkilikti kólemde ulǵaıtýdy qadaǵalaımyz. Memleket medıtsına qyzmetkerlerin áleýmettik qorǵaý men qoldaýdy kúsheıtý jóninde sharalar júrgizip keledi. Memleket basshysynyń tapsyrmasy boıynsha jyl saıyn medıtsına qyzmetkerleriniń jalaqysy kóterilýde», - dedi senator Nurlan Beknazarov.