Elimizdegi dene shynyqtyrý muǵalimderi Aqtóbede jarysqa tústi
AQTÓBE. QazAqparat - Elimizde alǵash ret dene shynyqtyrý pániniń muǵalimderi arasynda úshsaıystan jarys ótti. Aqtóbede ótken jarysqa 100-den astam muǵalim qatysty, dep habarlaıdy QazAqparat tilshisi.
Aqtóbege Atyraý, Almaty, BQO, Mańǵystaý, Qyzylorda, ShQO, Jambyl, Pavlodar, Qaraǵandy jáne Ońtústik Qazaqstan oblystarynan dene shynyqtyrý pániniń muǵalimderi keldi. Muǵalimder qysqa jáne uzaq qashyqtyqqa júgirý men qol kúresinen synǵa tústi.
«Dene tárbıese - jaýapkershilikti talap etetin pán. Adam óz balasyn qulap qalmasyn, aıaq-qolyn syndyryp almasyn dep baqylap, qarap, eskertý berip otyrady. Biz de sabaq kezinde oqýshylardyń aman-esen júrgenin qalaımyz. Sportta jaraqat alý múmkin, onyń saldarymen kúresýdi emes, aldyn-alýdy oılaımyz. Balalar telefon men kompıýterge baılanǵan, al dene shynyqtyrý páni balalardyń oıy men boıyn sergitedi. Qazirgi oqýshylar dene tárbıesi sabaǵyna asyǵyp, júrigip keledi. Ári oqýshylar arasynda negizgi pándi nashar ıgergenimen, dene tárbıesi pániniń úzdigi atanyp júrgender de kezdesedi. Áli bul qarapaıym júgirip, sekirip, dop qýatyn emes, jastardy patrıottyqqa tárbıeleıtin pán. Sportshylarymyz jetistikke jetse, elimizdiń kók týy kóteriledi, bıikten kórinse, keıingi urpaqty yntalandyrady. Sondyqtan salmaǵy basym salaǵa degen kózqaras ózgerdi, muǵalimder sol baǵyttaǵy jumysyn ári qaraı jalǵastyrady»,- dedi Shalqar aýdandyq №8 jalpy orta mektep muǵalimi Saǵynysh Tajekenov.
Aıta keteıik, jarysqa barlyǵy 122 dene tárbıesi pániniń muǵalimi qatysyp jatyr. Jarys eki kúnge sozylady. Jeńimpazdar kýbok jáne dıplomdarmen marapattalady.
