Elimizdegi buqaralyq sport kórsetkishterin tekserý kerek - sarapshy

NUR-SULTAN. QazAqparat – Qazaqstanda buqaralyq sport kórsetkishterin naqty tekserip shyǵý kerek. Bul týraly Májiliste onlaın rejımde ótken jıynda sport salasynyń sarapshysy Sadyq Mustafaev málim etti, dep habarlaıdy QazAqparat tilshisi.

«Jalpy, bizdegi máselege toqtalsam, buqaralyq sportty damytý jáne buqaralyq is-shara degen bar. Memleket basshysy buqaralyq sportty damytýǵa qatysty naqty tapsyrma berdi. Biraq barlyǵy buqaralyq is-shara ótkizedi. Sodan keıin buqaralyq sportty qatyryp jatyrmyz dep jan-jaqtan baıandaıdy», - Sadyq Mustafaev Májilistiń Áleýmettik-mádenı damý komıtetiniń keńeıtilgen otyrsynda.

Onyń aıtýynsha, qazirgi kezde oblystarda sport basqarmalaryn qysqartyp, olardy mádenıet basqarmasyna qosyp, mamandardy azaıtý bastamalary bar.

«Bulaı bolsa, salada kim jumys isteıdi? Joǵary oqý oryndarynda sport jaqsy deńgeıde degen pikirler aıtylyp jatyr. Meniń bilýimshe, JOO-larda dene shynyqtyrý sabaqtary qysqaryp keledi. Jalpy, Parlament depýtattary buqaralyq sport máselesin keminde ár úsh aı saıyn kóterip otyrsa durys bolar edi. Depýtattar óńirlerdi aralaǵanda ákimdik ókilderinsiz oqý oryndarynda, sport úıirmelerinde muǵalimdermen tikeleı sóılesseńizder kóp jaǵdaıdy anyqtaýǵa bolady», - dedi S. Mustafaev.

Osy oraıda ol eldegi buqaralyq sport kórsetkishterin naqty tekserip shyǵý kerek ekenin usyndy. Óıtkeni bul salany damytýǵa qatysty kórsetkishter naqty jaǵdaıǵa sáıkes kelmeıdi.

Budan buryn habarlanǵandaı, búgingi otyrys barysynda buqaralyq sport óńirlerdegi kóptegen azamat úshin áli de qoljetimdi emes ekeni aıtyldy.

Erlan Qojaǵapanovtyń sózine qaraǵanda, byltyr elimizdiń dene shynyqtyrý-sport qozǵalysyna 5,9 mln adam qatysqanyn aıtty.