Elimizdegi bos jumys oryndarynyń basym bóligi Astana qalasynda bolyp tur
ASTANA. 29 sáýir. QazAqparat - 2013 jylǵy 1 qańtardaǵy jaǵdaı boıynsha elimizdegi bos jumys oryndarynyń basym kópshiligi Astana qalasynda qalyptasqan. Bul 5 044 birlikti quraıdy. Budan keıingi oryndarda Almaty qalasy (4 964 birlik) jáne Shyǵys Qazaqstan oblysyndaǵy (3 039 birlik) iri jáne orta kásiporyndarynda qalyptasyp otyr. Bul týraly QR Statıstıka agenttiginiń «Іri jáne orta kásiporyndardaǵy kadrlarǵa qajettiligi jáne sany týraly» esebinde kórsetilgen.
Agenttik málimetterine qaraǵanda Astana qalasynda bos jumys oryndarynyń basym kópshiligi densaýlyq saqtaý jáne áleýmettik qyzmetter salasynda (1 733 birlik) bolsa, Almaty qalasynda kóterme jáne bólshek saýda men avtomobıl jóndeý salasynda (1 147 birlik), al Shyǵys Qazaqstan oblysynda ónerkásipte (1 431 birlik) qalyptasqan.
«Qyzmetkerlerge qajettiliktiń basym kópshiligi Qaraǵandy oblysynda belgilendi jáne bul atalǵan oblysta - 4 697 adamdy, Almaty qalasynda - 4 576 adamdy, Astana qalasynda - 4 403 adamdy, Qostanaı oblysynda - 4 138 adamdy qurady», - delingen agenttik habarlamasynda.
Sonymen qatar, bos oryndardyń eń az kórsetkishi Jambyl oblysynda - 148 birlik, Qyzylorda oblysynda - 216 birlik, Aqtóbe oblysynda - 303 birlikti quraǵan. Al qyzmetkerlerge eń az qajettilik Qyzylorda (276 adam), Aqmola (291 adam) jáne Aqtóbe oblystarynda (479 adam) qalyptasty.
