Elimizdegi bıznesti ala dorba arqalaǵan áıelder bastady - UKP
AQTÓBE. QazAqparat - «Atameken» UKP tóraǵasynyń orynbasary Eldar Jumaǵazıev Aqtóbedegi forýmda bıznestegi áıelderdiń róli týraly aıtyp berdi. Sonymen qatar, elimizde «5 myń aýylǵa 5 myń qamqorshy» jobasy iske asyrylatynyn jarııalady, dep habarlaıdy QazAqparat tilshisi.
Al «Atameken» UKP tóraǵasynyń orynbasary Eldar Jumaǵazıev 90-shy jyldary otbasyn asyrý úshin ala dorba arqalaǵan áıelderdi bıznestiń bastaýy dep atap ótti.
«Bızneste áıelder kóp dep aıtamyz. Jas urpaq bilmeýi múmkin, biraq táýelsizdiktiń alǵashqy jyldary qytaılyq ala sómkeni arqalaǵan áıelder Qytaı, Túrkııaǵa baryp, taýar tasydy. Bul - Qazaqstan bıznesiniń bastaýy. Bir áriptesimiz, «sol jyldary sómkemen zat tasyǵan áıelderge eskertkish qoısa da artyq etpeıdi» dep aıtqan bolatyn. Muny umytpaǵan jón»,- «Atameken» UKP tóraǵasynyń orynbasary Eldar Jumaǵazıev.
Kásipkerler palatasy «Bıznes bastaý» jobasy aıasynda aýylda jumyssyz júrgen adamdardy 1 aı boıy oqytady. Ótken jyly elimiz boıynsha 15 myń adam kásipkerlik álippesin úırenip, 8,5 myńy bıznes jobasy qorǵady. Al 3,5 myń adam jobasyn iske asyrýǵa nesıe aldy. Oqyp, óz jobasyn jasaǵan 5 myń adamdarǵa bıyl qarjy bólinedi.
«Bıyl 30 myń adam «Bıznes bastaý» jobasy arqyly oqytylady. Jospar boıynsha 20 myńnan astam adam bıznes josparyn quryp, qorǵaıdy. Kásipkerlik álippesin úırenip júrgenderdiń 70-80 paıyzy jumyssyzdar, óz-ózin jumyspen qamtyp otyrǵa adam. Máselen, Mańǵystaý oblysynyń 70 jastaǵy turǵyny oqyp, bıznes josparyn qorǵady. Qaǵaz ben qalam alyp, jospar quryp, 5 mıllıon teńge nesıe aldy. Qazir óziniń bes kelinine jumys berip otyr, jalaqy tóleıdi»,- dedi «Atameken» UKP tóraǵasynyń orynbasary Eldar Jumaǵazıev.
Al Aqtóbeniń Temir aýdany, Shubarqudyqta 50 adam oqydy. Onyń 15-ine nesıe berilip, kásipkerler jumysqa kiristi.
«Eń birinshi nesıe máselesin sheshý kerek. Degenmen bıznes jobanyń ómirsheńdigin esten shyǵarmaýǵa tıispiz. Sonymen qatar, Jaqsylyq Úshkempirovtiń týǵan aýylyna jasap jatqan kómegin negizge alyp, 5 myń aýyldy eseptep shyqtyq. «5 myń aýylǵa - 5 myń qamqorshy» jobasy bastaldy. Meniń oıymsha, kásipkerler týǵan aýylyna kómektesýge daıyn»,- dedi E.Jumaǵazıev.
«Rýhanı jańǵyrý» baǵdarlamasyndaǵy «Týǵan jer» jobasy aıasynda bul is qolǵa alyndy. Siz usynǵan ıdeıany qoldaımyz. 5 myń aýyl kóp emes. Bıznes ıeleri bizde birneshe ese kóp ekenin eskersek, bári sátti iske asyrylady. Ózge óńirlerdegi áriptesterim de qoldaıtynyna senimdimin. Aqtóbede «Tulek.kz» saıty ashylyp, týǵan jerge kómek berilip jatyr. Aýdan ortalyǵy ǵana emes, aýyldy da kóterý kerek»,- dedi Aqtóbe oblysynyń ákimi Berdibek Saparbaev forýmda sóılegen sózinde.
Eske sala keteıik, joǵaryda atalǵan forým jumysyna QR Eńbek jáne halyqty áleýmettik qorǵaý mınıstri Mádına Ábilqasymova qatysyp, Prezıdenttiń bes áleýmettik bastamasyn túsindirip bergen bolatyn.
