Elimizdegi bılet quny eń arzan áýe kompanııasy júkti qalaı tasymaldaıdy
NUR-SULTAN. QazAqparat - QR Indýstrııa jáne ınfraqurylymdyq damý mınıstrligi Qazaqstandaǵy loýkoster-tasymaldaýshy arqyly júk alyp júrýdiń tártibin túsindirdi, dep habarlaıdy QazAqparat tilshisi.
Budan burynǵy 20 kelige deıin júkti tegin tasymaldaý eskerilgen normada shyn máninde tasymaldaý qyzmeti aqyly boldy, ıaǵnı jolaýshyda júktiń bar nemese joq bolýyna qaramastan, bılet qunynda (4 myń teńgeden joǵary) qamtylyp keldi. Mysaly, bagajsyz saıahattaıtyn jolaýshy tasymaldaý tarıfine qosa bagaj shyǵyndaryn tólegen.
Bıýdjettik áýe kompanııany (loýkosterdi) iske qosý maqsatynda zańnamalyq turǵyda ózgerister engizildi, onda áýe kóliginde bagaj normasyn tasymaldaýshy aıqyndaıtyny eskerildi. Barsha álemde loýkosterler qyzmeti tıimdi bolyp sanalady, sebebi bılet quny barynsha tómen belgilendi. Alaıda tarıfti azaıtý úshin barlyq baǵyttar boıynsha shyǵyndardy qysqartý, sondaı-aq qosymsha qyzmetterdi azaıtý qajettigi týyndaıdy. Bul turǵyda júk tasymaldaý, bortta tamaqtandyrý nemese salonda oryndy tańdaý jáne basqa da qyzmetter bar.
«Otandyq loýkoster «Fly Arystan» kompanııasyn iske qosý bılet baǵasyn tómendetý esebinen turǵyndardyń áýe kóligine qoljetimdigin qamtamasyz etýge negizdelgen. Bıylǵy 1 mamyrda «Almaty-Nur-Sultan» baǵdary boıynsha alǵashqy áýe saparyn júzege asyrý josparlanǵan. Jalpy, bastapqy kezeńde 6 baǵytty iske qosý eskerilgen. Bul rette «Almaty-Qaraǵandy», «Almaty-Taraz», «Almaty-Oral», «Almaty-Pavlodar» jáne «Almaty-Shymkent» reısteri qamtylady. Áýe bıletterin satý sharalary bıylǵy 29 naýryzda bastalyp ketti. Osy baǵyttardaǵy tarıfter 3 999 teńgeden bastalyp, 12 999 teńgege deıin jetedi. 2023 jylǵa qaraı áýe baǵdary jelisin 54-ke deıin jetkizý qarastyrylyp otyr», - delingen vedomstvo habarlamasynda.
Aıta keteıik, atalǵan vedomstvo mınıstriniń áýe kóliginde jolaýshylar men júk tasymaldaý erejesin bekitý jónindegi 30.04.2015 jylǵy buıryǵyna tıisti ózgerister engizildi. Oǵan sáıkes, jol júginsiz tasymaldaý quqyǵy tek qana loýkoster-tasymaldaýshy, ıaǵnı «FlyArystan» kompanııasyna beriledi. Sonymen birge, 5 kelige deıin qol júgin alyp júrýge ruqsat etiledi. Al 20 keli deńgeıindegi jol júgi normasy basqa áýe kompanııalarynda saqtalady.
