Elimizdegi barlyq mýzeılerde túrli xalyqtardyń Qazaqstanǵa jer aýdarylýy týraly zaldar ashylady

ASTANA. QazAqparat - Elimizdiń barlyq mýzeılerinde túrli xalyqtardyń Qazaqstanǵa jer aýdarylýy týraly kórme ashylady. Bul týraly búgin Qazaqstan xalqy Assambleıasy keńesiniń keńeıtilgen otyrysynan keıin tilshilerge bergen suxbatynda QR-nyń burynǵy senatory, fılosofııa ǵylymdarynyń doktory Ǵarıfolla Esimov málim etti.

Búgin osyndaı zaldardyń alǵashqysy Astanadaǵy Ulttyq mýzeıde ashyldy. Bul zalda 818 zattaı jádigerler men 191 eksponat qoıylǵan. 470-ten astam zattaı aıǵaqtar men qujattar Qazaqstanǵa kóshirilgen 38 etnos týraly maǵlumattardan turady.

Kórmede QR Ulttyq muraǵatynyń, Ortalyq Memlekettik fotoqujattar men qoljazbalar muraǵatynyń, QR Tuńǵysh Prezıdentiniń muraǵatynyń qujattary qoldanylǵan. Sonymen qatar "Bolgarlar" blogynyń 10 zatyn Qazaqstandaǵy Bolgarııa elshiligi usynǵan. "Kelisim" qoǵamdyq qory "Koreı mýzykalyq teatry" atty taqyryppen 46 kitap, 100 fotoqujat tabystady.

Al 22 stendte QHA-nyń 22 jyldyq tarıxy men jylnamasy qoıylyp otyr.

"Birtektilik, birlik óziniń bir aýyr, dramalyq tarıxyna ıe. Sol tarıx qujattardan, faktilerden, tulǵalardan, ataly sózderden kórinis tabýy tıis edi. Jáne ol Qazaqstan xalqy Assambleıasynyń zalynan da kórinis tapty. Endi osyndaı mádenı-áleýmettik shara respýblıkanyń barlyq mýzeılerinde ótedi. Bizdiń eldiń barlyq murajaılarynda osyndaı zaldar ashylady", - dep atap ótti professor.