Elimizdegi barlyq memlekettik tildi oqytý ortalyqtary tekserýden ótedi

Bul týraly búgin Mádenıet mınıstrliginde ótken jıyn barysynda Til komıtetiniń tóraǵasy Sherýbaı Qurmanbaıuly osylaı dedi.

«Búgingi kúni elimizde 101 memlekettik tildi oqytý ortalyqtary qyzmet etip keledi. 2011-2020 jyldarǵa arnalǵan tilderdi damytýdyń memlekettik baǵdarlamasynda osy ortalyqtardy akkredıtatsııalaý sharasy kózdeledi. Sonymen qatar, ortalyqtardyń ádistemelik deńgeıin, oqýlyqtarynyń, oqytýshylardyń sapasyn tekserý de qarastyrylǵan. Bul baǵytta múddeli memlekettik organdardy, onyń ishinde Bas prokýratýra, memlekettik qyzmet isteri agenttiginiń ókilin, joǵary bilikti mamandardy, qoǵamdyq uıymdar ókilderin qatystyra otyryp, arnaıy komıssııa qurdyq. Atalǵan komıssııa respýblıkamyzdyń óńirlerindegi barlyq ortalyqtarǵa baryp, olardy tekserýden ótkizedi», - dedi Sh. Qurmanbaıuly.

Onyń aıtýynsha, ortalyqtardy akkredıtatsııalaý barysynda olarǵa monıtorıng jumystary júrgizilip, júıeli, oryndy sharalar atqaryp jatqandar boıynsha úlgi retinde usynymdar jasalady. Al sapasy syn kótermeıtin ortalyqtardy jabý nemese biriktirýge deıingi sharalar qabyldanady. «Buǵan deıin, árıne, mundaı tekserister bolyp turatyn. Alaıda, sońǵy eki-úsh jylda bundaı ortalyqtardyń sany kúrt ósip otyr. Sonyń ishinde jekemenshik jabylǵan uıymdar da boldy», - dedi komıtet tóraǵasy.