Elimizdegi barlyq aýyl 2025 jyly aýyz sýmen tolyq qamtylady
Qurylys jáne turǵyn úı-kommýnaldyq sharýashylyq isteri komıteti tóraǵasynyń orynbasary Ázimbek Nálibaev tóraǵalyq etken basqosýǵa jaýapty mekeme basshylary men jergilikti atqarýshy organdardyń ókilderi qatysty.
Jıynda aıtylǵandaı, b úginde elimizdiń 4 764 aýyldyq eldimekeninde sapaly aýyz sýmen jabdyqtaý jumystary tolyǵymen aıaqtaldy. Qalǵan 1 533 aýyldyń 496-synda ortalyqtandyrylǵan sýmen jabdyqtaý qurylysy josparlanǵan bolsa, turǵyndar az qonystanǵan 1 037 eldi mekende jergilikti bıýdjet qarajaty esebinen keshendi blok-modýlder ornatylmaq.
Jalpy alǵanda 2025 jylǵa qaraı elimiz boıynsha sapaly aýyz sýǵa qoljetimdilikti 100 paıyzǵa deıin arttyrý kózdelip otyr. Bul – «Qýatty óńirler – el damýynyń draıveri» ulttyq jobasy sheńberinde júzege asyrylmaq.
«Ótken jyldyń qorytyndysy boıynsha elimizde sýmen jabdyqtaý qyzmetterine qoljetimdilik 96 paıyzdy qurady. Onyń ishinde, qalalarda 98 paıyz bolsa, aýyldyq eldimekenderdiń úles salmaǵy – 93 paıyz. Qazirgi tańda Atyraý, Soltústik Qazaqstan, Qyzylorda jáne Mańǵystaý oblystaryndaryndaǵy qala turǵyndary 100 paıyz sapaly aýyz sýmen qamtamasyz etilgen», – dep atap ótti komıtet tóraǵasynyń orynbasary Á.Nálibaev.
Onyń aıtýynsha, aldaǵy ýaqytta sýmen qamtamasyz etý kórsetkishteri tómen óńirlerge basymdyq berilip, tıisti qarajat bólinbek. Olardyń qatarynda Qostanaı, Soltústik Qazaqstan jáne Jambyl oblysyndaǵy aýyldyq eldimekender bar.
Foto: webben7.se
