Elimizdegi balalardyń 32,7 paıyzy mektepke deıingi tárbıemen qamtylǵan
ASTANA. Naýryzdyń 19-y. QazAqparat /Qanat Mámetqazyuly/ - Elimizdegi balalardyń 32,7 paıyzy mektepke deıingi tárbıemen qamtylǵan. Búgin QR Parlamenti Májilisinde ótip jatqan «Memlekettik til - el birliginiń kepili» atty ǵylymı konferentsııa barysynda baıandama jasaǵan QR Bilim jáne ǵylym mınıstri Janseıit Túımebaev osylaı málim etti,
dep habarlaıdy QazAqparat.
Óz sózinde mınıstr elimizdiń ulttyq bilim berý júıesinde qazaq tiliniń mátebesin nyǵaıtýǵa ıgi yqpalyn tıgizgen jumystarǵa toqtalyp ótti. Máselen, J. Túımebaevtyń sózine qaraǵanda birinshiden, elimizde qazaq tilinde bilim beretin oqý oryndarynyń jelisi keńeıtilgen. Ekinshiden, qazaq tilinen basqa tildegi mektepterde, JOO-daǵy orys tilinde bilim beretin toptarynda qazaq tiliniń oqý saǵattary artqan. Úshinshiden, qazaq tilin memlekettik til retinde oqytatyn mamandar daıarlyǵyn kólemi ósti. Tórtinshiden, «Bolashaq» baǵdarlamasy boıynsha shetelge oqýǵa úmitkerler úshin qazaq tilinen emtıhan tapsyrý talaby engizildi. Besinshiden, ulttyq birińǵaı testileý barysynda qazaq tilinen basqa tilde oqytylatyn mektep túleri qazaq tilinde test tapsyratyny jolǵa qoıyldy.
«Jalpy, týǵan tilimizdiń órisin keńeıtip, óresin bıiktetetin asa pármendi tetikterdiń biri qazaq tilinde bilim beretin uıymdardyń kóbeıýi bolmaq. Búgingi kúni respýblıkada 4 myń 972 balabaqsha men shaǵyn ortalyqtar qyzmet etedi, onda elimizdegi balalardyń 32,7 paıyzy mektepke deıingi tárbıemen qamtylǵan. Mektepke deıingi tárbıe beretin uıymdardyń 65,2 paıyzynda qazaq tilinde tárbıeleý júrgizilip otyr», dedi J. Túımebaev. Onyń aıtýynsha, sońǵy on jylda qazaq tilinde tárbıe beretin uıymdar qatary 2 myń 260-qa artqan. Al sońǵy úsh jylda jetim jáne ata-ana qamqorlyǵynsyz qalǵan balalarǵa arnalǵan 10 mekemeniń jumysy tolyqtaı qazaq tiline kóshirilgen.
