Elimizdegi baqylanbaıtyn ekonomıka kórsetkishi 19,5 paıyzdy qurap otyr - Á. Smaıylov
ASTANA. 28 qańtar. QazAqparat - Qazaqstandaǵy baqylanbaıtyn ekonomıkanyń jalpy ishki ónimdegi úlesi 19,5 paıyzdy quraıdy. Búgin Parlament Májilisinde ótken Úkimet saǵatynda Statıstıka agenttiginiń tóraǵasy Álıhan Smaıylov osylaı málim etti.
«Kóleńkeli ekonomıka kórsetkishiniń ádistemesi OESR ádistemesi boıynsha tutas ekonomıka jáne ekonomıkalyq qyzmet boıynsha esepke alynady. Al olardy jalpylama «baqylanbaıtyn ekonomıka» dep ataımyz. Bularǵa «kóleńkeli ekonomıka», «beıresmı ekonomıka» jáne «zańsyz ekonomıka» jatady. Sonymen qatar, elimizde osy jalpy «baqylanbaıtyn ekonomıkanyń» úlesi jalpy ishki ónimde 19,5 paıyzdy quraıdy», - deıdi agenttik tóraǵasy.
Onyń aıtýynsha, «baqylanbaıtyn ekonomıka» ishinde eseptilikti usynbaý jáne eseptilikti tómendetý «kóleńkeli ekonomıkaǵa» kiredi. Olardyń úlesteri tıisinshe 3,2 jáne 6,6 paıyzdy quraıdy. Al «beıresmı ekonomıkaǵa» úı sharýashylyqtary men tirkelmegen jeke kásipkerler jumysy kiredi. Olardyń kólemi 9,7 paıyzdy quraıdy.
«Baqylanbaıtyn ekonomıkanyń esepterin odan ári jetildirý úshin zańsyz ekonomıkany da aldaǵy ýaqytta esepke alatyn bolamyz», - deıdi Á. Smaıylov.
