Elimizdegi baǵalaý qyzmetin tek arnaıy kýáligi bar mamandar ǵana júrgize alady - QR Baǵalaýshylardyń respýblıkalyq palatasy
ASTANA. Qyrkúıektiń 13-i. QazAqparat /Arman Asqarov/ - «Baǵalaý qyzmeti týraly» QR zańynyń jańartylǵan nusqasy boıynsha elimizdegi baǵalaý qyzmetin tek arnaıy kýáligi bar mamandar ǵana júrgize alady. Bul týraly búgin elordada ótken baspasóz máslıhatynda QR Baǵalaýshylardyń respýblıkalyq palatasynyń tóraǵasy Vılen Elıseev málim etti, dep habarlaıdy QazAqparat.
Onyń aıtýynsha, Qazaqstanda baǵalaý qyzmetimen aınalysatyn mamandar palatanyń múshesi bolýy mindet. «Zańǵa sáıkes, eger baǵalaýshy maman palatanyń múshesi bolmasa, oǵan osy salada jumys isteýge bolmaıdy. Búgingi tańda 3 myńǵa jýyq kýálik bólinip otyr. Osy ýaqytqa deıin Respýblıkalyq palataǵa kiretin jergilikti palatalardyń quramyna 726 maman kirýge nıet bildirdi», - deıdi V.Elıseev.
Palata tóraǵasy atap kórsetkendeı, baǵalaýshynyń aty-jóni men kýálik nómirin palatanyń saıtynda tabýǵa bolady. «Eger azamattar jergilikti jerlerdegi palatalardyń qyzmetine qanaǵattanbasa, olar Respýblıkalyq palataǵa kelip, aryzdana alady. Palata janyndaǵy sarapshylar keńesi kez kelgen aryz-ótinishti qarap, shuǵyl túrde tıisti sheshimdi shyǵaryp beredi», - dep atap kórsetti V.Elıseev.
