Elimizdegi ajalyn sýdan tapqandardyń kóbisi - sýǵa mas kúıinde shomylǵandar
ASTANA. 8 tamyz. QazAqparat - Bıylǵy jeti aıdyń ishinde 50 bala sýǵa ketti. Bul týraly búgin Astanada ótken brıfıngte Tótenshe jaǵdaılardy joıý departamenti Apattyq qutqarý jumystaryn uıymdastyrý basqarmasynyń bas sarapshysy Serik Bersimbaev málim etti.
«Bıylǵy 7 aıda elimizdiń sý aıdyndarynda 1 078 adam zardap shekti. Bul kórsetkish ótken jyldyń sáıkes kezeńimen salystyrǵanda 28 paıyzǵa tómen. Sonyń ishinde aǵymdaǵy jyly QR TJM sýda qutqarý qyzmetiniń qutqarýshylary 777 adamdy (onyń 209-y balalar) qutqardy. 301 adam sýǵa ketti (onyń 50-i balalar)»,- dedi bas sarapshy.
Belgili bolǵandaı, azamattar kóbinese Almaty (63 adam), Qostanaı (28), Soltústik Qazaqstan (27) jáne Qyzylorda (25) oblystary aýmaǵyndaǵy sý aıdyndarynda sýǵa batqan.
Onyń aıtýynsha, ózender men kólderde adamdar kóp jaǵdaıda qaýipsizdik erejelerin saqtamaı, jabdyqtalmaǵan jerlerde shomylady. «Sýǵa ketkenderdiń jalpy sanynan 52 paıyzy nemese 158 oqıǵada adamdar júzý bilmeý, óz kúshin jete baǵalamaý, júzý quraldarynda jeke qutqarý jabdyqtarynsyz otyrý sekildi sebeptermen opat boldy. Al 93 oqıǵa (31 paıyzy) sýǵa mas kúıinde shomylýǵa baılanysty, sondaı-aq 50 oqıǵa (17 paıyzy) balalardyń eresekterdiń qaraýynsyz sýǵa túsýi saldarynan bolyp otyr»,- dep túıdi S. Bersimbaev.
