Elimizdegi avtojoldarda datchıkter ornatylýda
«QazjolǴZI» AQ men «Jol aktıvteri sapasynyń ulttyq ortalyǵy» RMK birlesip, jol qurylymy men onyń topyraqty tabanynyń temperatýrasy men ylǵaldylyǵy deńgeıin anyqtaýǵa arnalǵan datchıkterdi ornatý sharalaryna kiristi. Budan bólek, joldardy paıdalaný kezinde oryn alǵan kórsetkishterdiń ózgeristerin baǵalaýǵa baǵyttalǵan zertteýler júrgzilip jatyr», - delingen QR Indýstrııa jáne ınfraqurylymdyq damý mınıstrligi málimetinde.
Joldardy paıdalaný kezinde olardyń sapasyna kóptegen faktorlar áser etedi. Joldan ótetin kólik sanynyń kóptigi, jolǵa túsiriletin júktemeniń shamadan asýy, elimizdiń klımattyq jaǵdaıy (ásirese, temperatýralyq-ylǵaldyq rejım) jol qurylymynyń beriktigine, túıirshikti quramǵa, jol jamylǵysy qabattarynyń tyǵyzdyǵyna, joldyń jaǵdaıyna óz áserin tıgizedi.
«Ornatylǵan arnaıy datchıkter statıstıkalyq málimetterdi jınap, jol jabyndysy sapasynyń ózgerýine sebep bolǵan jaǵdaılardy anyqtaýǵa, jol qurylymynyń jaǵdaıyn tolyqqandy zertteýge múmkindik beredi. Bul óz kezeginde ǵalymdarǵa elimizdiń ár túrli óńirlerindegi klımattyq jaǵdaılar men jol ýchaskelerine túsiriletin júktemelerdi esepke ala otyryp, qurylys, qaıta jańartý jáne jóndeý jumystarynyń tehnologııasyn túzetýge múmkindik bermek», - dep atalyp ótken vedomstvo málimetinde.
Qazirgi kezde «Petropavl – Qorǵan» jáne «Nur-Sultan qalasynyń ońtústik-batys aınalma joly» avtomobıl joldarynyń ýchaskelerin zertteý jumystary júrgizilip jatyr. Sonymen qatar, aldaǵy ýaqytta mamandar «Omby – Maıqapshaǵaı», «Qurty – Býrylbaıtal» jáne «Aqtóbe – Atyraý» tasjoldarynyń ýchaskelerin zertteıtin bolady.
