Elimizdegi aýmaqtardyń deninde tsıklonnyń áseri sezilmek - Qazgıdromet
ASTANA. 13 sáýir. QazAqparat - Qostanaı, Aqmola, Soltústik Qazaqstan, Pavlodar oblystarynda 14-18 sáýir aralyǵynda jaýyn túsip, túnde synap baǵanasy plıýs 2-3 gradýstan mınýs 5-10 gradýsqa tómendemek.
Bul týraly «Qazgıdromet» RMK habarlaıdy.
Batys Qazaqstan, Atyraý, Aqtóbe óńirlerinde 14-17 sáýir aralyǵynda qar aralas jańbyr jaýyp, aýa temperatýrasy 0-5 gradýs jylydan mınýs 0-5 gradýsqa tómendeıdi.
Qaraǵandy oblysynda 15-18 sáýirde jaýyn-shashyn bolady. Túnde aýa temperatýrasy 2-7 jylydan 3-8 gradýs sýyqqa deıin tómendemek.
Meteorologııalyq boljamǵa sáıkes, elimizdiń basym aýmaqtarynda tsıklonnyń jáne oǵan baılanysty atmosferalyq fronttyń áseri sezilip, jańbyr jaýady, jel kúsheıip, soltústik pen soltústik-batysta tuman túsedi. Tek shyǵysta jáne ońtústik-shyǵysta kún jaýyn-shashynsyz.
Qostanaı, Soltústik Qazaqstan, Aqmola, kúndiz Pavlodar, Qaraǵandy, Jambyl oblystarynyń keı jerlerinde jeldiń ekpini sekýndyna 15-20 metrge jetip, Soltústik Qazaqstan, Qostanaı oblystarynda tuman túsedi. Qyzylorda, Ońtústik Qazaqstan aımaqtarynda keı jerlerde naıǵazaı oınap, jeldiń jyldamdyǵy sekýndyna 15-20 metrge deıin kúsheıedi dep boljanyp otyr. Almaty oblysynyń Jalańashkól aýmaǵynda jeldiń jyldamdyǵy 15-20 metrge jetedi. Aqtóbe oblysynda túnde jáne tańerteń tuman túsedi.
Gıdrologııalyq boljamǵa júginsek, Jaıyq ózeninde, Qostanaı, Soltústik Qazaqstan, Aqmola oblystaryndaǵy ózenderde (Esil, Jabaı, Tobyl, Aıat, Jelqýar, Obaǵan jáne t.b.) aldaǵy 3 táýlikte kóktemgi sý tasqyny jalǵasyp, sýdyń kólemi artady. Atbasar qalasyndaǵy Jabaı ózeninde sýdyń kólemi shamadan tys asyp, tómen jerlerde ornalasqan ýchaskelerdi sý basýy yqtımal.
Aýa raıy jylyp, qar kúrt erı bastap, Shyǵys Qazaqstan oblysyndaǵy ózenderde jaýyn-shashyn kútiletindikten, aǵyndy sýlar qaýipti deńgeıden asyp, sý tasqyny oryn alýy múmkin. Ertis ózeninde Shúlbi sý qoımasynan tómenirek jerde sý deńgeıi kóterilse, odan tómenirek Semııarda muz oıylyp, keptelister oryn alýy yqtımal. Almaty oblysynda kún jylyp, jaýyn túsetindikten tómen taý aımaqtarynda ornalasqan ózenderdiń deninde sýdyń mólsheri artyp, keıbir ózenderde aǵyndy tasqyn qalyptasýy múmkin.
Seısmologııalyq boljam: 2013 jyldyń 11-17 sáýir kúnderi aralyǵynda Almaty polıgony aýmaǵynda MSK-64 shkalasy boıynsha jer silkinisteri bolmaıdy dep kútilýde.
