Elimizdegi áýejaılar qustarmen qalaı kúresedi
ALMATY.QazAqparat - Almaty Halyqaralyq áýejaı basqarmasy ushý aımaǵyndaǵy ornıtologııalyq ahýal týraly aıtyp berdi, dep habarlaıdy QazAqparat tilshisi.
«Ushý kezinde ornıtologııalyq máselelerge tap bolamyz. Almaty áýejaıynyń mańyndaǵy egistikter máseleni odan ári ýshyqtyryp otyr. Dándi daqyl egistigine usaq jándikter men qustar kóp jınalatyndyǵy belgili. Biz bul máselemen kúreste halyqaralyq tájirıbelerdi qoldanýdamyz. Biraq bar jumys munymen bitpeıdi. Áýe kemesi qustarmen jıi soqtyǵysady. Jaqynda ǵana «Eır Astana» áýe kompanııasy bul máselege usynysyn bildirgen edi. Biz oblystyq, aýdandyq ákimdiktermen birlesip aerodrom aýmaǵyna qustar jınalmaıtyndaı etip, alańdy basqa mádenıetpen toltyrýdy qolǵa alamyz»,-dedi Almaty áýejaıynyń birinshi vıtse-prezıdenti Aleksandr Gordeev.
Búginde áýejaıda ornıtologııalyq qyzmet kúsheıgen. Alaıda qustardyń qoldanylyp jatqan amal sharalardan bir jola úrkıtin túri joq.
«Biz arnaıy qustar tobyna nysanaǵa alatyn lazerli qarýdy paıdalandyq. Nátıjesinde qustardyń ushaqqa soǵylýy sırep keledi. Negizgi tasymaldaýshy «Eır Astana» jalpy júk kóleminiń 60 paıyzyn tasymaldaıdy. Statıstıkaǵa súıensek jylyna qustarmen 8-10 ret soǵysý faktisi tirkeledi eken. Onyń ishinde áýe kemesine zııanı keltiretin jaǵdaılar bar»,-dedi vıtse-prezıdent.
Áýejaı qustarmen 5 jyldyq kúrestiń arqasynda ushaq kelip qonatyn Klıýchı aýdanyndaǵy qoqys úıindisinen arylǵan. Burynǵy qoqys alańynyń topyraǵy qaıta qalpyna keltirilip, aerodrom aýmaǵynda qustar azaıǵan.
