Elimizdegi áýejaılar 6,2 mln jolaýshyǵa qyzmet kórsetti

NUR-SULTAN. QazAqparat - Elimizdegi áýejaılar bıylǵy 8 aıda shamamen 6,2 mln jolaýshyǵa qyzmet kórsetti, dep habarlaıdy QazAqparat tilshisi.

IIDM Baspasóz qyzmetiniń málimetinshe, bul kórsetkish ótken jylǵydan (11,8 mln. adam) 47% az.

«Osy kezeńde 3,2 mln jolaýshy tasymaldandy. Bul kórsetkish te ótken jyldyń sáıkes kezeńimen (5,6 mln jolaýshy) salystyrǵanda 43% tómen. Buǵan álemde koronavırýs ınfektsııasynyń taralýyna baılanysty Qazaqstan aýmaǵynda áýe reısterin oryndaýǵa engizilgen shekteý áser etti», delingen habarlamada.

Qazirgi ýaqytta ishki reıster, sonymen qatar Ońtústik Koreıa, Nıderlandy, Birikken Arab Ámirlikteri, Germanııa, Túrkııa, Belarýs, Ýkraına, Ózbekstan, Qyrǵyzstan, Egıpet jáne Reseı sııaqty 11 elge tikeleı halyqaralyq jolaýshylar reısi oryndalýda.

Barlyq reıster QR Kóliktegi Bas sanıtarlyq dárigeriniń qaýlysyna sáıkes sanıtarlyq-epıdemıologııalyq qaýipsizdiktiń sharalaryn qatań saqtaı otyryp, oryndalady.

«Elimizdiń barlyq áýejaılarynda dezınfektsııalyq jumystar júrgizilýde. Qoldy óńdeýge arnalǵan sanıtaızerler ornatylyp, karantın sharalary (áleýmettik qashyqtyq, betperde taǵý, qolǵap kııý) saqtalady. Áýejaı ǵımarattaryna kireberiste jolaýshylar men áýejaı qyzmetkerleri arasynda qashyqtyq saqtap, termometrııa ólsheý júrgiziledi», delingen habarlamada.