Elimizdegi áýe kemeleriniń qaýipsizdigi syn kótermeı tur - prokýratýra
ASTANA. Maýsymnyń 11-i. QazAqparat /Aıdar Ospanalıev/ - Bıylǵy jyldyń 5 aıynda Ortalyq kólik óńiri aımaǵynda áýe ushaqtarynyń 9 apatty jaǵdaıy oryn aldy. Olardyń 7-ýi qurastyrý óndirisi salasynyń kemshilikterine baılanysty oryn alsa, 2-ýi adam faktorlary saldarynan bolǵan.
Bul týraly búgin Astanada áýe kemeleriniń qaýipsizdigin qamtamasyz etýge baılanysty ótken arnaıy májilis barysynda Ortalyq kólik prokýratýrasynyń bólim prokýrory Kenel Qulyshev málim etti, dep habarlaıdy QazAqparat.
Ol keltirgen derekterge qaraǵanda, 2009 jyldyń 12 aıynda 12 áýe kólikteriniń apatty jaǵdaıy oryn alyp, olardyń 7-ýi qurastyrý óndirisi qyzmetiniń kemshiligimen baılanysty bolǵan. Al 2 jaǵdaı kólikterdiń qustarmen soqtyǵysýyna baılanysty, sondaı-aq 3 oqıǵa adam faktorlarymen baılanysty bolǵan. «Áýe qozǵalysy barysynda adam faktorlary saldarynan oryn alatyn jaısyz jaǵdaılardyń sany 40 paıyzǵa kemidi dep aıtyp júrgenimizben, bıylǵy jyly ushaqtardyń jaǵdaıyna baılanysty júrgizilgen prokýrorlyq tekserýler áýe kólikteriniń qaýipsizdigi talapqa saı emestigin kórsetip otyr», dedi bólim prokýrory.
Onyń aıtýynsha, elimizde áýe kompanııalarynyń qajetti qural-saımandardy Kólik jáne kommýnıkatsııa mınıstrliginiń Azamattyq avıatsııa komıtetiniń ruqsatynsyz alý jaǵdaılary jıi kezdesedi. Áýe kompanııalary tipti Azamattyq avıatsııa komıtetiniń ruqsatynsyz áýe kólikterin de alyp kelý jaǵdaılary bolǵan. Sondaı-aq tekserýler barysynda áýe kompanııalarynyń tehnıkalyq jóndeý jumystaryn da arnaıy ruqsatsyz júrgizgendigi anyqtalǵan. Ol az bolsa, elimizdegi keıbir ushaqtar adam sanyn da belgilengen mólsherden kóp alyp ushatyn kórinedi.
