Elimizdegi astyq problemasy negizinen ǵalamdyq qarjy daǵdarysy aıasynda álemdegi astyq óndirý kórsetkishiniń ósýine oraı týyndady - A. Kúrishbaev
ASTANA. Qarashanyń 9-y. QazAqparat /Qanat Mámetqazyuly/ - Qazaqstandaǵy astyq máselesine qatysty problema negizinen ǵalamdyq qarjy daǵdarysy aıasynda álemdegi astyq óndirý kórsetkishiniń ósýine, onyń aýyspaly qorlarynyń kóp bolýyna baılanysty týyndaǵan.
Búgin QR Parlamenti Májilisinde ótken Úkimet saǵatynda Aýyl sharýashylyǵy mınıstri Aqylbek Kúrishbaev osylaı málim etti, dep habarlaıdy QazAqparat.
«Búgingi kúnniń ózekti máseleleriniń biri aǵymdaǵy jylǵy rekordtyq kórsetkishpen jınalǵan qazaqstandyq astyqty tıimdi paıdalaný, ótkizý bolyp tabylady. Qazaqstandaǵy astyq máselesine qatysty problema negizinen ǵalamdyq qarjy daǵdarysy aıasynda álemdegi astyq óndirý kórsetkishiniń ósýine, onyń aýyspaly qorlarynyń kóp bolýyna baılanysty týyndady. Qazir barlyq álemdik astyq naryǵynda ónimdi satyp alý aýqymy birshama tómendep, sonyń saldarynan astyq baǵasy kúrt túsip ketti. Bunyń barlyǵy Qazaqstannyń ishki naryǵyna jaǵymsyz keıipte áser etip otyr. Óıtkeni bizdiń astyq negizinen eksporttalýǵa baǵyttalǵan ónim bolyp tabylady», dedi Aýyl sharýashylyǵy mınıstri. Sonymen birge, A. Kúrishbaev, eldegi astyq naryǵynda oryn alǵan problemaǵa qatysty Úkimet tarapynan arnaıy keńes ótkizilgenin aıta kele, onyń nátıjesi boıynsha is-sharalar jospary qabyldanǵanyn atap ótti.
