Elimizdegi árbir úshinshi tonna et Aqmola oblysynda óndiriledi
Aqmola oblystyq kásipkerlik jáne týrızm basqarmasynyń málimetinshe, qazirgi kúni oblysta jalpy ishki ónimniń 27,6 paıyzy ónerkásip salasynyń úlesine tıedi. Al, ónerkásip salasynyń óz ishinde óńdeýshi kásiporyndar ónimderiniń úlesi - 78,6 paıyz.
Ónerkásip salasynda búgingi kúni 732 kásiporyn jumys isteıdi. Onyń ishinde azyq-túlik ónimderin óńdeıtin 145 kásiporynnyń birinshi toqsandaǵy óndirgen ónim kólemi - jalpy ónimniń 15,4 paıyzyn aldy.
Sońǵy bes jyldyń ishinde bul salada joǵary ósim saqtalyp keledi. Naqtyraq alsaq, 2018 jyly – 107,6 paıyz, 2019 – 103,2, 2020 – 109,9, 2021 – 115,5, 2022 – 101,1 paıyz boldy. Bıylǵy alǵashqy úsh aıdaǵy azyq-túlik ónimderin óńdeý salasyndaǵy ósim - 4,1 paıyz. Osy kezeń ishinde et jáne shujyq ónimderin shyǵarý 10,8 paıyzǵa, sary maı óndirý 69,4 paıyzǵa, ósimdik maıyn shyǵarý 74,7 paıyzǵa ósken.
«Respýblıkamyzdaǵy bizdiń oblysymyzdyń osy saladaǵy alatyn úles salmaǵy qomaqty. Árbir úshinshi tonna et Aqmola oblysynda óndiriledi. Sondaı-aq, elimiz boıynsha óndirilgen árbir 7-lıtr sút, árbir 12-lıtr mıneraldy sýsyn, árbir 12-tonna sary maı, árbir 15-tonna un bizdiń oblysymyzdyń úlesine tıedi», - deıdi basqarma basshysynyń orynbasary Aleksandr Zagrebın.
Qazirgi kúni oblysta óndirilgen aýyl sharýashylyǵy ónimi óńir turǵyndaryn tolyq qamtamasyz etip qana qoımaı, respýblıkanyń basqa aımaqtaryna jáne shet elderge eksportqa shyǵarýǵa múmkindik beredi. Máselen, un shyǵarý oblys turǵyndarynyń qajettiliginen 33 esege, qus etin óndirý 7 esege, jumyrtqa óndirý 3,5 esege artyq.
«Óz qajetimizden artyqtardy satýǵa shyǵaramyz. Munyń ózi aımaǵymyzdyń ónimderin eksportqa shyǵarý kólemin arttyrýǵa ıgi yqpalyn tıgizip otyr. Oblysymyzda óńdeýshi sala kásiporyndaryn salý jobalary odan ári jalǵasyp jatyr. Qazirgi kúni 478 mlrd teńgeniń 65 jobasy júzege asyrylý ústinde. Bul jobalar iske qosylǵanda 5,5 myń qosymsha jumys oryndary ashylmaq. Olardyń 3/1-i azyq-túlik ónimderin óńdeıtin kásiporyndardyń úlesine tıedi. Tarata aıtar bolsaq: «ıÝnıkornHoldıngs» qus fabrıkasyn salý jobasyna 65 mlrd teńge qarastyrylyp otyr. Qus fabrıkasy jylyna 50 myń tonna qus etin shyǵaratyn bolady. Jumys istep turǵan «Makınsk qus fabrıkasy» ónimin jylyna 100 myń tonnaǵa jetkizý jobasyna 25,7 mlrd teńge qarastyrylyp otyr. Joba iske qosylǵanda qosymsha 33 myń tonna et ónimderi shyǵarylatyn bolady. Jylyna 5000 keli osetr ıkrasyn shyǵaratyn «Akva Vıktorııa» seriktestiginiń jabyq sý toǵanyn salýǵa 4,3 mlrd teńge bólindi», - dep tolyqtyrdy Aleksandr Zagrebın.
Basqarma basshysynyń orynbasary atap ótkendeı, óńirde aýylsharýashylyǵy ónimderin óndirý kólemin arttyrýǵa baǵyttylǵan ınvestıtsııalyq jobalar da qolǵa alynady.
«Oblysta 50 iri ınvestıtsııalyq jobalardy biriktiretin Jol kartasy bekitildi. Bul jobalardy júzege asyrýǵa 250 mlrd teńgeden astam qarjy bólinip otyr. Investıtsııalyq jobalar 2021-2025 jyldarǵa arnalǵan. Osy jobalardy júzege asyrý azyq-túlik ónimderin óndirý kólemin aıtarlyqtaı arttyrýǵa múmkindik jasaıdy. Sondaı-aq, óńirde astyq pen kókónis saqtaý qoımalarynyń syıymdylyǵyn 176 myń tonnaǵa jetkizý josparlanyp otyr. Joǵaryda atalǵan jobalardy júzege asyrý qosymsha 2,5 myń jumys ornyn ashýǵa múmkindik jasaıdy», - dep túıindedi Aleksandr Zagrebın.
Aıta ketsek, budan buryn Qazaqstanda alǵash ret iri qara mal tuqymdary kórmege shyǵarylǵanyn jazǵan edik.
