Elimizdegi árbir besinshi oqýshy qandaı da bir aýrýmen aýyrady - G. Yqsanova
ASTANA. QazAqparat - Elimizdegi árbir besinshi mektep oqýshysy qandaı da bir aýrýmen aýyrady. Búgin Májiliste ótip jatqan buqaralyq sportty jáne dene shynyqtyrýdy damytý taqyrybyndaǵy Úkimet saǵatynda Áleýmettik-mádenı damý komıtetiniń tóraıymy, depýtat Gúlnár Yqsanova osylaı málim etti.
Depýtattyń aıtýynsha, sońǵy jyldary qoǵamnyń densaýlyqqa, sportqa degen nazary belgili bir nátıjeler bergen. Máselen, Densaýlyq saqtaý jáne áleýmettik damý mınıstrliginiń málimetterine qaraǵanda, qazaqstandyqtar arasynda úsh jylda temeki, alkogol paıdalaný kórsetkishi birshama tómendegen. Semizdik kórsetkishi de azdap tómendep otyr. «Qazaqstandyqtardyń 26,3 paıyzy sportpen, dene shynyqtyrýmen júıeli túrde aınalysady. Alaıda, birqatar oblystar nysanaly ındıkatorǵa qol jetkize almaı otyr. Budan bólek, mektep oqýshylary arasynda bul kórsetkish tómendegen. Balalarymyz deni saý bolýy kerek. Alaıda, osy baǵyttaǵy jumys kóńilge kirbiń salady», dedi G. Yqsanova.
Onyń sózine qaraǵanda, sportqa jiti kóńil bólmeý saldarynan Qazaqstandaǵy mektep jasyndaǵy balalardyń 75 paıyzy gıpodınameıadan japa shegedi.
«Dáriger mamandar balalar arasynda tirek-qımyl apparatynyń buzylý aýrýlary jıilegenin aıtady. Sońǵy eki jylda skoleozben aýyratyndar sany eki eseden asqan. Al árbir besinshi mektep oqýshysynyń boıynda bir aýrý bar bolyp otyr. Mine, sonyń nátıjesinde áskerge shaqyrylǵandardyń tek úshten biri ǵana jaramdy bolyp shyqqan. Olardyń árbir úshinshisi áskerge jaramsyz degen sóz», dedi G. Yqsanova.
