Elimizdegi Analar keńesi ońtústikte bas qosty

ShYMKENT. QazAqparat - Qazaqstan halqy Assambleıasy janyndaǵy  1 774 Analar keńesi rýhanı jańǵyrý aıasynda Ońtústik Qazaqstan oblysynda bas qosty.  Oblys ortalyǵyna jınalǵan názikjandylar «Rýhanı jańǵyrý» baǵdarlamalyq maqalasyn iske asyrýdaǵy Analar keńesiniń rólin talqylady, dep habarlaıdy QazAqparat tilshisi.

Jıynǵa Qazaqstan halqy Assambleıasy tóraǵasynyń orynbasary, hatshylyq meńgerýshisi Darhan Myńbaı men Ońtústik Qazaqstan oblysynyń ákimi Janseıit Túımebaev, QR Bas prokýratýrasy men QHA qyzmetkerleri qatysty. Sondaı-aq  ǵalymdar men respýblıkalyq qoǵamdyq uıymdardyń jetekshileri, barlyq oblystardaǵy Analar keńesteriniń tóraıymdary da osy jerden tabyldy. Bas qosýda sóz alǵan oblys ákimi Janseıit Túımebaev jer júzindegi barlyq halyqtyń óz aldyna ult bolyp uıysýyna, jeke halyq, egemen el, derbes memleket bolyp qalyptasýyna áıel-analardyń sińirgen eńbegi orasan ekenin atap ótti.

«Búginde bizdiń qoǵamdaǵy analarymyz elimizde bolyp jatqan barlyq jaǵymdy jańalyqtarǵa, qoǵamdaǵy ómirsheń ózgeristerge, ıdeıalyq-saıası, áleýmettik-mádenı jumystarǵa, memleketimizdiń búkil tynys-tirshiligine belsene aralasyp otyr. Statıstıkalyq málimetterge súıensek, bizdegi jalpy memlekettik qyzmetshilerdiń teń jartysynan astamy áıelderdiń úlesine tıedi eken. Bul - úlken kórsetkish, joǵary nátıje, jaqsylyqtyń nyshany. Qazaqstan halqy assambleıasy janynan Analar keńesin qurý eldigimizge tán, tarıhı dástúrimizben tamyrlas bastama bolyp tabylady», - dedi aımaq basshysy.

Respýblıkalyq otyrysta Memleket basshysynyń «Bolashaqqa baǵdar: rýhanı jańǵyrý» baǵdarlamalyq maqalasynda aıtylǵandaı, ulttyq dástúrdi negizge ala otyryp, otbasy qundylyqtaryn dáripteý, urpaq tárbıesindegi ózekti máselelerdi talqylaý men  usynystar ázirleý, urpaqtan urpaqqa jalǵasyp kele jatqan ózara syılastyq pen tatýlyq, meıirimdilik, birlik pen kelisim sekildi eldigimizdiń tiregi bolǵan qundylyqtardy keńinen nasıhattaý jaıy qaraldy.  

Aıta ketý kerek, búginde Qazaqstan halqy Assambleıasy janynda konsýltatıvtik-keńesshi organ retinde oblystyq, aýdandyq, aýyldyq deńgeıde 1 774 Analar keńesi jumys isteýde. Keńeste 9 234 adam múshe bolyp tabylady. Al, Ońtústik Qazaqstan oblystyq Qazaqstan halqy Assambleıasy janynda 202 Analar keńesi bar. 1130-dan astam múshesi bar keńes ajyrasýdyń aldyn alý men otbasydaǵy urpaq tárbıesi, jasóspirimder arasyndaǵy qylmys pen quqyqbuzýshylyq syndy ózekti máseleler tóńireginde 640-tan astam is-shara uıymdastyryp, birqatar aýqymdy bastamalardy qolǵa aldy.