Elimizdegi áleýmettik-saıası jáne ekonomıkalyq jaǵdaı turaqty - halyq pikiri

ASTANA. 3 mamyr. QazAqparat /Aınur Kenebaeva/ - Elimizdegi áleýmettik-saıası jáne ekonomıkalyq jaǵdaı turaqty. Halyq arasynda júrgizilgen saýalnama nátıjelerine sáıkes, bundaı qorytyndyny búgin baspasóz máslıhatynda «InfoSystem zertteý ortalyǵy» qoǵamdyq qorynyń dırektory Saltanat Ahmedova jarııa etti.

Aıta ketelik, 7-27 sáýiri aralyǵynda 14 oblys pen respýblıkalyq mańyzy bar Almaty jáne Astana qalalarynda «Qazaqstan halqynyń áleýmettik-saıası jaǵdaıynyń serpini» atty áleýmettik zertteý júrgizilgen bolatyn. Saýalnama barysynda sarapshylar 1623 respondenttiń jaýabyn taldaýdan ótkizdi.

Saýalnama nátıjesi boıynsha respondentterdiń basym bóligi eldegi ekonomıkalyq jaǵdaıǵa oń baǵa bergen. Aǵymdaǵy ekonomıkalyq jaǵdaıdy turaqty damý ústinde dep baǵalaıtyndardyń jalpy kórsetkishi 89,2%-dy quraǵan.

Saltanat Ahmedovanyń aıtýynsha, qazirgi tańda qoǵamda turaqty oń áleýmettik-saıası jaǵdaı baıqalýda. «Qazaqstandyqtar arasynda eldegi jaǵdaıdy, sondaı-aq óz ómir jaǵdaıyn oń baǵalaý basym. Qazaqstandaǵy jalpy jaǵdaıdy baǵalaý serpinin zertteı otyryp, bolashaǵyna úmitpen qaraıtyn respondentter aıtarlyqtaı óskenin kórýge bolady».

Zertteý nátıjeleri kórsetkendeı, eldegi jaǵdaıdy «jaıly, tynysh» dep baǵalaıtyndardyń úlesi 91,2%-ǵa ósken. Eldegi jaǵdaı túsiniksiz degen pikirdegilerdiń úlesi 3,6 %-ǵa azaıǵan. Jaýap berýge qınalǵandar - 5,2%.

Saltanat Ahmedovanyń jarııa etken málimetteri boıynsha, óziniń jáne óz otbasynyń jaǵdaıymen qanaǵattanatyndardyń deńgeıi aıtarlyqtaı joǵary - 83,6%, bul naýryz aıyndaǵy kórsetkishten joǵary bolyp otyr. Tıisinshe, tolyǵymen jáne jartylaı qanaǵattanbaıtyndar úlesi azaıyp, 15,8 %-dy qurady, ıaǵnı aqpan aıyndaǵy kórsetkishten 0,8%-ǵa tómen bolǵan.