Elimizdegi áleýmettik mańyzy bar taýarlar qory 1 mln tonnany quraıdy

ASTANA. QazAqparat – Elimizdegi áleýmettik mańyzy bar taýarlar qory 1 mln tonnany quraıdy. Bul týraly Úkimet otyrysynda Aýyl sharýashylyǵy mınıstri Erbol Qarashókeev aıtty, dep habarlaıdy QazAqparat tilshisi.

«Óńirlerdiń jedel derekterine sáıkes, osy jyldyń 2 aqpanyna respýblıka boıynsha 1 mln tonnadan astam áleýmettik mańyzy bar taýarlarynyń qory bar. Onyń ishinde kásiporyndarda, kókónis qoımalarynda - 519 myń tonna, qoımalarda – 194,7 myń tonna, saýda jelilerinde – 183,3 myń tonna, turaqtandyrý qorlarynda – 24,4 myń tonna. Ákimdikter ótken jyldyń kúzinen bastap osy jyldyń maýsymaralyq kezeńinde naryqqa retteýshi áser etý úshin kókónis qorlaryn qalyptastyrý boıynsha jumys júrgizýde. Biz óz tarapymyzdan ákimdikterge «ınflıatsııalyq kezeńde» ishki naryqtyń qajettiligin jabý úshin kókónister boıynsha usynylatyn kólemdi jetkizdik», - dedi mınıstr.

Onyń dereginshe, kartop boıynsha mınıstrlik usynatyn kólemi 73 myń tonnany quraıdy. Bul rette Abaı, Ulytaý jáne Almaty oblystarynyń ákimdikteri óńirlik suranysty eskere otyryp, qajettilik kólemin azaıtty. Abaı oblysy ákimdiginiń málimetinshe, kartopqa degen qajettilik 2 100 tonnany quraıdy jáne osy kólemde kelisimshart jasaldy. Ulytaý oblysyndada uqsas jaǵdaı. Almaty oblysy ákimdiginiń derekteri boıynsha kartopqa degen qajettilik 727 tonnany quraıdy. Degenmen, ákimdik kelisimsharttyń qalǵan kólemin uzartý múmkindigimen 1 234 tonnaǵa kelisimshart jasady.

«Jalpy óńirler 85,8 myń tonna kartopqa kelisimshart jasady. 13 óńir jasyl aımaqta. Onda kelisimsharttar kólemi mınıstrlik usynatyn kóleminiń 100 jáne odan da kóp paıyzyn quraıdy. Kelisimsharttardyń kólemi 50-den 100 paıyzǵa deıingi sary aımaqta 7 óńir ornalasqan. Bul rette, kartop óndirýshilerdiń negizgi óńirleri – Soltústik Qazaqstan jáne Pavlodar oblystary naryqtaǵy kartop qorynyń jetkiliktiligin atap ótýde. Pavlodar oblysynda maýsymaralyq kezeńde satý úshin 20 000 tonna kartopqa jergilikti aýyl sharýashylyǵy taýar óndirýshilermen memorandýmdar jasaldy. Ákimdikterdiń derekteri boıynsha ishki naryq qajettiligin osy jyldyń mamyr aıynan bastap ońtústik elderden 5,1 myń tonna kóleminde ımporttyq jetkizilimder, shilde aıynda Túrkistan oblysynan 4,9 myń tonna kóleminde erte kartop jetkizý esebinen qamtamasyz etý josparlanýda», - dedi Erbol Qarashókeev.