Elimizdegi agrarlyq ǵylym jáne oqý úderisin damytýǵa tek avtonomdy mártebe ǵana kómektese alady - QazATÝ rektory
ASTANA. QazAqparat - Elimizdegi agrarlyq ǵylym men oqý úderisin damytýǵa tek avtonomdy mártebe ǵana kómektese alady.
Bul týraly búgin arnaıy brıfıngte S.Seıfýllın atyndaǵy Qazaq agrotehnıkalyq ýnıversıtetiniń rektory Aqylbek Kúrishbaev aıtty.
«Eger de elimizde Batystaǵy tárizdi aýyl sharýashylyǵyna qatysty ǵylym men óndiris damysyn desek, onda biz álemdegi ozyq oqý oryndaryndaǵy sııaqty oqý úderisterin ózgertýimiz qajet. Búginde olardyń ǵalymdary bizge kelip, osyndaı baǵdarlamalardy engizýge daıyn otyr. Endi másele nede? Másele bizdiń standarttarymyzda. Búgingi zańnamalar boıynsha biz bul baǵdarlamalardy engize almaımyz», - dedi A. Kúrishbaev.
Onyń aıtýynsha, Nazarbaev Ýnıversıtetiniń az ǵana ýaqyttyń ishinde úlken jetistikke jetýine avtonomdy mártebeniń arqasynda aldyńǵy qatarly oqý standarttaryn engizýi sebep bolyp otyr.
Rektordyń málimdeýinshe, QazATÝ-dyń mártebesi jáne onyń bazasynda qurylýy tıis zertteý ýnıversıteti týraly máseleniń týyndaýyna jýyrda AShM tarapynan Úkimetke jiberilgen atalǵan JOO-ny AShM jáne basqa da memorgandardyń qaraýyna bergizý jaıyndaǵy usynystar negiz bolǵan.
Aıta keteıik, 2013 jyly 22 mamyrda QR Prezıdenti Nursultan Nazarbaev Shetel ınvestorlary keńesiniń 26-shy plenarlyq otyrysynda: «Úkimetke ınvestorlarmen birlese otyryp, aýyl sharýashylyǵy salasynda Nazarbaev Ýnıversıteti negizinde álemdik dárejedegi zertteý ýnıversıtetin qurý máselesin qarastyrý kezek kúttirmeıtin másele. Onyń bazasy Seıfýllın atyndaǵy Qazaq agrotehnıkalyq ýnıversıteti bola alady. Ol 3 quramdas bólikti biriktirýi tıis: JOO, aýmaqtyq ǴZI jáne tájirıbelik sharýashylyqtar»,- dep atap ótken bolatyn.
