Elimizdegi 6 jasqa deıingi balalarǵa polımıelıtke qarsy vaktsına egildi
ALMATY. Qyrkúıektiń 15-i. QazAqparat /Ádilet Musahaev/ - Elimizdegi 6 jasqa deıingi balalarǵa polımıelıtke qarsy vaktsına egý jumystary óte joǵary deńgeıde júrgizildi. Bul jaıynda búgin Almatyda arnaıy ótken baspasóz máslıhatynda epıdemııalyq monıtorıngtiń mamandary aıtty, dep habarlaıdy QazAqparat.
Mamandardyń aıtýynsha 6-10-shy qyrkúıek aralyǵynda búkil Respýblıka boıynsha 1 mıllıon 600 myńnan asa bala osy ekpemen qamtylǵan. Almaty qalasy boıynsha 99,3 paıyz bala qamtylyp, 120 myńnan asa bala polımıelıt syrqatyna qarsy egilgen.
Bul is-sharany júrgizý barysynda emdik mekemeler, onyń ishinde balalar emhanalarynyń árbir egý bólimshelerinde úsh mamannyń qatysýymen jumys atqarylyp, jergilikti ákimshilik, densaýlyq saqtaý Basqarmasy tarapynan kómek kórsetilgen.
Sanıtarlyq epıdemııalogııalyq saraptama jáne monıtorıngti respýblıkalyq ǵylymı-tájirıbelik ortalyǵynyń bólim meńgerýshisi Aınagúl Qýatbaeva sonymen qatar halyq arasynda jurtshylyqty osy egýge shaqyrý, onyń qajettiligin túsindiretin úgit, nasıhat jumystary da belsendi júrgizilgendigin aıtady. "Bul shara Tájikstan memleketindegi polımıelıt indetiniń shyǵýyna oraı onyń aldyn-alyp, elimizde tarap ketpesi úshin júrgizilip otyr. Bul vırýs shaqyratyn indet bolyp tabylady. Biraq memleketimizde mundaı syrqatqa ushyraǵan oqıǵa 1995 jyly tirkelgen bolatyn. Mundaı jappaı bir mezgilde qomaqty balalar sanyn egý jumystary sol 1995-1997 jyldary júrgizilgen edi. Óıtkeni 1990-1995 jyldary jylyna osyndaı indet boıynsha 1-2 jaǵdaı tirkelip otyrǵan. Sol ýaqyttaǵy egýdiń nátıjesinde elimiz osy polımıelıt naýqasyn shaqyratyn vırýstan arylyp, onyń taralýy memleket aımaǵynda toqtatylǵan jáne 2002 jyldan bastap respýblıkamyz osy sal aýrýynan taza degen dúnıejúzilik densaýlyq saqtaý uıymynyń sertıfıkatyna usynylyp, oǵan ıe bolǵan edi", deıdi A.Qýatbaeva.
A.Qýatbaeva osy indetke qarsy Belgııalyq vaktsına óndirýshi oryndarymen tikeleı qarym-qatynas jasaý arqyly vaktsına arzanǵa túskendigin aıtady. "Bul vaktsınanyń dozasy 57 mıllıon teńgege alynyp otyr. Bul balalar arasynda burynnan keń túrde qoldanyp kele jatqan vaktsına bolyp eseptelinedi. Vaktsınanyń keri áseri óte tómen, ıaǵnı qarama-qarsy kórsetkishteri az", dep atap ótti óz sózinde Aınagúl Qýatbaeva.
Osy jumysty júrgizý barysynda respýblıka boıynsha 6591 egý bólimsheleri uıymdastyrylǵan. Sondaı-aq kólik pen jol máselesi týyndaǵan eldi-mekenderge jyljymaly egý brıgadalary da uıymdastyrylǵan.
Almaty qalasy boıynsha sanepıdemııalyq qadaǵalaý bóliminiń bastyǵy Sáýle Nurǵalıeva Tájikstannan kelgen otbasylardy anyqtap, sonyń nátıjesinde 6 balaǵa egý jumystaryn júrgizgendigin aıtady. «Qalalyq polıtsııanyń kómegimen shetten jumys izdep kelgen otbasylardy tirkep, balalaryn tekserýden ótkizdik. Qazir mundaı balalar bizdiń baqylaýymyzda tur», deıdi S. Nurǵalıeva
