Elimizdegi 572 myń stýdenttiń aqyly túrde bilim alyp jatqandarynyń úlesi 75 paıyzdy qurap otyr
ASTANA. 18 sáýir. QazAqparat - Qazaqstandaǵy joǵary oqý oryndarynda stýdentterdiń 34 paıyzy syrttaı oqıdy. Bul týraly QR Parlamenti Májilisiniń Áleýmettik-mádenı damý komıtetiniń otyrysynda QR Bilim jáne ǵylym vıtse-mınıstri Murat Orynhanov málim etti.
«Búginde elimizde 136 joǵary oqý orny jumys isteýde. Onyń ishinde 9-y ulttyq, 33 memlekettik oqý orny bar. Qazirgi kezde qazaqstandyq joǵary oqý oryndarynda 571 myń 691 adam oqıdy. Sonyń ishinde kúndizgi bilim berý formasynda 66 paıyzy bilim alýda, al qalǵan 34 paıyzy syrttaı oqıdy»,-dedi vıtse-mınıstr.
Onyń sózine qaraǵanda, memlekettik joǵary oqý oryndarynda stýdentterdiń 72 paıyzy kúndizgi bólimde, 28 paıyzy syrttaı tálim alýda. «Al jekemenshik 63 oqý oryndarynda barlyǵy 206 myń stýdent bar. Onyń 48 paıyzy kúndizgi, sondaı-aq 52 paıyzy syrttaı oqıdy»,-dedi ol.
Taratylǵan málimetterge qaraǵanda, elimizde aqyly túrde bilim alyp jatqandardyń úlesi 75 paıyzdy qurap otyr.
