Elimizdegi 500-den astam aqparattyq júıeniń 178-i ǵana jaramdy

ASTANA. QazAqparat – Elimizdegi 500-den astam aqparattyq júıeniń 178-i ǵana jumys istep tur. Bul týraly QR Sybaılas jemqorlyqqa qarsy is-qımyl agenttigi Preventsııa qyzmetiniń basshysy Saıan Ahmetjanov málim etti, dep habarlaıdy QazAqparat tilshisi.

Ortalyq kommýnıkatsııalar qyzmetindegi baspasóz máslıhaty barysynda ol tsıfrlandyrýǵa bólingen bıýdjet qarajatynyń jumsalýyna qatysty júrgizilgen saraptama nátıjelerine toqtaldy.

Onyń atap ótýinshe, elimizde sońǵy 8 jylda 500-den astam aqparattyq júıe ázirlenip, oǵan birneshe júzdegen mıllıard bıýdjet qarajaty jumsalǵan. Alaıda, atalǵan aqparattyń júıelerdiń 178-i ǵana qajetke jarap tur.

«Aqparattyq júıelerdi jasaýshylardyń otandyq naryǵy 5 kvazımemlekettik kompanııanyń qolyna shoǵyrlanǵan. Olar atalǵan aqparattyq júıelerge tapsyrystyń shamamen 50 paıyzyn alǵan. Osy jáne ózge de faktorlar jemqorlyq táýekelderdiń aldyn alý jáne jemqorlyq qylmystardyń jolyn kesý úshin úlken mánge ıe», - dedi Saıan Ahmetjanov.

Preventsııa qyzmetiniń basshysy saraptama nátıjesi tıisti memlekettik orǵandarǵa jiberilgendigin basa aıtty.