Elimizdegi 50 myń sý aıdynynyń barlyǵyna birdeı qutqarýshylar beketin ornatý múmkin emes - R.Imanqulov
ASTANA. QazAqparat - Elimizdegi 50 myń sý aıdynyna birdeı qutqarýshylar beketin ornatý múmkin emes. Bul týraly búgin QR ІІM Tótenshe jaǵdaılar komıtetiniń resmı ókili Rýslan Imanqulov málim etti.
«Aǵymdaǵy jyly sý aıdyndarynda adamdardyń qaza bolýynyń negizgi sebepteri olardaǵy qaýipsizdik qaǵıdalarynyń óreskel buzylýy bolyp otyr», - dedi ol.
R.Imanqulovtyń alǵa tartqan derekterine qaraǵanda, oqys oqıǵalaryń 39 paıyzy (75 oqıǵa) eresekterdiń balalardy qaraýsyz qaldyrýdan, 25 paıyzy (45 oqıǵa) balyq aýlaý kezinde qaýipsizdik qaǵıdalaryn buzýdan, 23 paıyzy (43 oqıǵa) júze almaý nemese óziniń kúshin jete baǵalamaýdan, 13 paıyzy (32 oqıǵa) mas kúıde sýǵa shomylýdan oryn alǵan.
«Qazaqstan boıynsha 50 myń sýy aıdyny bar. Olardyń barlyǵyn birdeı qutqarýshylar beketimen jabdyqtaý múmkin emes. Sondyqtan adamdardy óz ómirlerine beı-jaı qaramaı, qaýipsizdik sharalaryn qatań ustanýǵa shaqyramyz», - deıdi komıtettiń resmı ókili.
Osy rette ol sý aıdynynda demalýǵa barǵan kezde mas kúıde shomylmaýǵa, qaıyqtan, katerden, ótkelderden, sýǵa sekirmeýge, júzý shegi belgilenetin qaltqy belgilerden aspaýǵa, sý aıdyndaryn lastamaýǵa, jalǵan dabyl berip aıǵaılamaýǵa shaqyrdy.
