Elimizdegi 400-den asa avtogaz quıý ornynda órt qaýipsizdigi buzylǵan
NUR-SULTAN. QazAqparat - Ótken jyly elimizdegi 444 avtogaz toltyrý stantsııasynda órt qaýipsizdigi buzylǵan. Bul týraly QR ІІM Tótenshe jaǵdaılar komıtetiniń tóraǵasy Vladımır Bekker málim etti, dep habarlaıdy QazAqparat tilshisi.
«Bizdiń qoldaǵy málimet boıynsha, Qazaqstandaǵy qalalar men eldi mekenderde 1167 avtogaz toltyrý stantsııasy (AGTS) bar. Al jalpy, el aýmaǵynda 3 myńnan astam janarmaı quıý beketi jumys istep tur. 2018 jyldyń qorytyndysy boıynsha, tekseris kestesine saı 648 avtogaz toltyrý stantsııasyna tekserý jumystary júrgizildi. Onyń qorytyndysy boıynsha, 444 AGTS órt qaýipsizdigi talaptaryn buzǵany anyqtaldy. 48 AGTS-ta órtke qarsy aralyq boıynsha buzýshylyqtyń bary belgili boldy», - dedi QR ІІM Tótenshe jaǵdaılar komıtetiniń tóraǵasy Vladımır Bekker ІІM-de ótken baspasóz máslıhatynda.
Komıtet tóraǵasy óz sózinde buzýshylyqqa jol bergeni úshin 323 zańdy tulǵa ákimshilik jaýapkershilikke tartylǵanyn aıtyp ótti.
«2019 jyldyń 5 aıynyń qorytyndysy boıynsha, 125 avtogaz toltyrý stantsııasy men janarmaı quıý beketine órt qaýipsizdigine qatysty tekserý júrgizildi. Olardyń ishinde 84 stantsııa órt qaýipsizdigi boıynsha buzýshylyqqa jol bere otyryp, jumys istep turǵany belgili boldy. 8 stantsııada órtke qarsy aralyq boıynsha buzýshylyqtyń bary anyqtaldy. Qalǵan beketter 2019 jyldyń ekinshi jartyjyldyǵynda tekserýden ótpek», - dedi Vladımır Bekker.
