Elimizdegi 2 mln. 300 myń gektar sýarmaly jerdiń 900 myń gektary jaramsyz bolyp qalǵan - Q. Aıtahanov
ASTANA. Jeltoqsannyń 24-i. QazAqparat /Qanat Mámetqazyuly/ - Elimizdegi 2 mln. 300 myń gektar sýarmaly jerdiń 900 myń gektary, nemese 40 paıyzy sorlanyp, batpaqtalyp, isten shyqqan bolyp otyr. Búgin QR Parlamenti Senatynyń jalpy otyrysynda Úkimet basshysynyń atyna saýal joldaǵan senator Qýanysh Aıtahanov osylaı málim etti,
dep habarlaıdy QazAqparat.
«Sońǵy jyldary Elbasy tapsyrmasyna sáıkes, agroónerkásip keshenin memlekettik qoldaýǵa erekshe nazar aýdarylyp, qyrýar qarjy bólinýde. Daǵdarysqa qaramastan aýyl sharýashylyǵy damý qarqynynyń joǵary bolýy da osyǵan baılanysty bolyp tabylady. Endigi másele osy salaǵa bólinip jatqan qarjyny paıdalanýdyń tıimdiligin arttyrý, ony qaıtarymy mol, kepildi ónim beretin salalarǵa baǵyttaý. Bundaı salanyń biri aýyl sharýashylyǵynyń altyn qory bolyp esepteletin, turaqty túrde mol egin alýdy qamtıtyn - sýarmaly egin sharýashylyǵy. Bul jerlerde búgingi kúni elimizde tapshylyq tanytyp otyrǵan ósimdik maıy, qant, kókónis, jemis-jıdekter, maqta daqyldary, mal ónimderi úshin qajetti qurama jemniń negizin quraıtyn soıa men júgeri daqyldary ósiriledi. Buryn aıdalǵan jerdiń 5 paıyzyn qurap, egin sharýashylyǵy ónimderiniń 35 paıyzyn berip kelgen elimizdegi sýarmaly jerleri 2 mln. 300 myń gektardy qurasa, búgingi tańda bunyń 900 myń gektary, nemese 40 paıyzy sorlanyp, batpaqtanyp isten shyqqan. Nátıjesinde elimizde jyl saıyn 250 mlrd. teńge kóleminde aýyl sharýashylyǵy ónimderi óndirilmeı qalýda. Al qoldanystaǵy 1 mln. 400 myń gektar sýarmaly jerdiń tıimdiligi de óz dárejesinde emes», dedi Q. Aıtahanov.
Depýtattyń aıtýynsha, sýarmaly jerler kádimgi jerlermen salystyrǵanda qosymsha sharalardy atqarýdy qajet etedi. Al bundaı jumystarǵa sáıkesinshe qosymsha qarajat qajet. Az ǵana jeri bar, qarajatqa jarymaıtyn sharýalardyń sýarmaly jerlerdi baptaýǵa shamalary kelmeıdi. «Elimizdiń azyq-túlik qaýipsizdigin nyǵaıtý men aýyl sharýashylyǵy ónimderin eksporttaýǵa paıdalaný maqsatynda sýarmaly egin sharýashylyǵynyń áleýetiniń tıimdiligin arttyrý qajet. Bul rette birqatar máseleler sheshimin tabýy tıis. Atap aıtqanda, aınalymnan shyǵyp qalǵan 900 myń gektar sýarmaly jerlerdi el ıgiligine paıdalanýdy qarastyrý qajet. Al qoldanystaǵy 1 mln. 400 myń gektar sýarmaly jerlerge memlekettik qoldaý kerek. Budan basqa, osy saladaǵy ınnovatsııalyq baǵyt bolyp tabylatyn tamshylatyp sýarýdy yntalandyrý shart. Úkimet osy máselelerge basa nazar aýdaryp, aldaǵy ýaqytta arnaıy jıyn ótkizse eken», dedi senator Q. Aıtahanov.
