Elimizdegi 113 medıtsınalyq-áleýmettik mekeme karantınge jabylady
NUR-SULTAN. QazAqparat - QR Eńbek jáne halyqty áleýmettik qorǵaý mınıstrligi QR Densaýlyq saqtaý mınıstrligimen birlesip qamqorlyqtaǵy adamdardyń egde adamdar men múgedektigi bar adamdarǵa arnalǵan medıtsınalyq-áleýmettik mekemelerge, sondaı-aq ýaqytsha bolý uıymdaryna barýyna tyıym salady, dep habarlaıdy QazAqparat tilshisi.
«Bul shara uıymdarda koronavırýstyq ınfektsııanyń taralýyna jol bermeý maqsatynda qabyldanýda. Áleýmettik mekemeler qyzmet kórsetýdi jalǵastyrady. Mekemelerde sanıtarlyq-dezınfıkatsııalyq rejım kúsheıtiledi. Atap aıtqanda, qyzmetkerler men qamqorlyqtaǵy adamdardy maskalarmen, antıseptıkalyq quraldarmen, qolǵaptarmen jáne basqa da qorǵanys quraldarymen qamtamasyz etiledi. Qamqorlyqtaǵylardyń qatysýymen uıymdar ishinde de, olardan tys ta buqaralyq sporttyq jáne mádenı is-sharalar ótkizilmeıtin boldy», - dep habarlaıdy Eńbek jáne halyqty áleýmettik qorǵaý mınıstrliginen.
Sondaı-aq, respýblıkadaǵy epıdemıologııalyq jaǵdaı turaqtanǵanǵa deıin sanatorııalyq-kýrorttyq emdeý qyzmetin kórsetýdi toqtata turý usynyldy. Bul sharalar Qazaqstanda tótenshe jaǵdaı aıaqtalǵanǵa deıin jalǵasady.
«Budan basqa, jeke kómekshiler men ymdaý tili mamandary kórsetken qyzmetter boıynsha qujattardy (oryndalǵan jumystar aktisi, súıemeldeý paraqtary) qabyldaý elektrondyq formatta júzege asyrylady», - delingen habarlamada.
Esterińizge sala keteıik elimizde 24410 adamǵa qyzmet kórsetetin 113 medıtsınalyq-áleýmettik mekeme jumys isteıdi.
