Elimizdegi 10 avtomobıl ótkizý pýnktinde elektrondy kezek júıesi engizildi

ASTANA. QazAqparat – Elimizdiń memlekettik shekarasyndaǵy 10 avtomobıl ótkizý pýnktinde elektrondy kezek júıesi engizildi. Bul týraly Qarjy mınıstrliginiń Memlekettik kirister komıteti Baqylaý departamentiniń dırektory Eldos Saýdabaev aıtty, dep habarlaıdy QazAqparat tilshisi.

«Shekaradaǵy keptelister men kútý tasymaldaýshylardyń shekaradaǵy jaǵdaı týraly, onyń ishinde ótkizý pýnktteriniń keptelisi týraly aqparattyń bolmaýyna baılanysty bolady. Mundaı jaǵdaı álemniń kóptegen elinde bolyp jatady jáne osyndaı faktilerdi boldyrmaý úshin jekelegen elder óz shekaralarynda elektrondyq kezek engizedi. Óıtkeni elektrondyq kezek júıesi taýarlar men kólikterdiń qozǵalysyn retteýge jáne ashyqtyqty qamtamasyz etýge yqpal etedi.

Búginde Belarýs Respýblıkasy men Baltyq elderiniń oń tájirıbesi bar. Olarda kezekti brondaý júıesi burynnan engizilgen. Máselen, úshinshi eldermen memlekettik shekaradaǵy 10 avtomobıl ótkizý pýnktinde barlyq tasymaldaý protsesiniń ashyqtyǵyn qamtamasyz etetin elektrondy kezek júıesi engizildi», - dedi ol Ortalyq kommýnıkatsııalar qyzmetindegi baspasóz máslıhatynda.

Onyń atap ótýinshe, elektrondy kezek júıesiniń arqasynda barlyq yqtımal manıpýlıatsııalar men sybaılas jemqorlyq táýekelderi joıyldy. Naqty kezekte turyp, kútý de alynyp tastaldy.

«Bıyl 1 shildeden bastap elektrondy kezek júıesin paıdalana otyryp, avtokólik quraldaryn ótkizýdi reglamentteıtin birqatar normatıvtik-quqyqtyq akti qoldanysqa endi. Buryn qoldanylǵan ýaqytsha shemalar óz kúshin joıdy», - dedi Eldos Saýdabaev.

Departament dırektorynyń dereginshe, osy ýaqytqa deıin elektrondy kezek júıesi arqyly shekaradan 89 myńǵa jýyq avtokólik ótti.