Elimizde zorlyq-zombylyqqa ushyraǵandarǵa kómek kórsetetin 21 daǵdarys ortalyǵy jumys isteıdi
ASTANA. 22 qarasha. QazAqparat /Marlan Jıembaı/ - Elimizde zorlyq-zombylyqqa ushyraǵandarǵa kómek kórsetýge arnalǵan 21 daǵdarys ortalyǵy jumys isteıdi. Bul týraly búgin elordada ótken «Otbasy jáne qoǵam: dástúrler, qundylyqtar jáne damý keleshegi» atty halyqaralyq konferentsııa barysynda QR Eńbek jáne halyqty áleýmettik qorǵaý mınıstri Gúlshara Ábdiqalyqova málim etti.
Búgingi kúni elimizde zorlyq-zombylyqqa ushyraǵandarǵa kómek kórsetetin 21 daǵdarys ortalyǵy jumys isteıtindigin atap ótken mınıstrdiń aıtýynsha, buǵan deıin olar halyqaralyq donorlar esebinen ustalsa, aǵymdaǵy jyly 13 daǵdarys ortalyǵy memlekettik bıýdjet esebinen qarjylandyryla bastaǵan. «Bir ǵana Shyǵys Qazaqstan oblysynyń ózinde osyndaı 6 daǵdarys ortalyǵy qyzmet jasaıdy. Olardy Atyraý, Batys Qazaqstan, Jambyl, Qaraǵandy jáne Qyzylorda oblystarynda ashý múmkindikterin qarastyrý máselesi alda tur. Ótken jyly daǵdarys ortalyqtaryna 31 myńnan astam adam júginip, kómek aldy» - dedi G.Ábdihalyqova.
Sondaı-aq mınıstrdiń aıtýynsha, ata-analardyń jumysyn úıdegi mindetterimen ushtastyrý múmkindigin qamtamasyz etý maqsatynda halyqty qashyqtan jumyspen qamtýdy engizý júrgizilýde. Mundaı ilki jobany ótken jyly QR Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııa Aqtóbe oblysynyń bıýdjettik mekemelerinde iske qosqan.
