Elimizde jylý berý qazandyqtarynyń 97 paıyzy daıyndaldy - mınıstr

NUR-SULTAN. QazAqparat – Jylý berý maýsymyna turǵyn úıler boıynsha Pavlodar, Soltústik Qazaqstan oblystarynda daıyndyq tıisti deńgeıde emes. Bul týraly Úkimet otyrysynda Indýstrııa jáne ınfraqurylymdyq damý mınıstri Qaıyrbek Óskenbaev aıtty, dep habarlaıdy QazAqparat tilshisi.

«Turǵyn úılerdiń jyly berý maýsymyna daıyndyǵyna toqtalsaq, jóndeý jumystary josparlanǵan 48 413 turǵyn úıdiń 42 383-i nemese 88 paıyzy daıyn. Turǵyn úı daıyndyǵynyń tómen qarqyny Pavlodar (67%, 2 484-ten 1 651), Soltústik Qazaqstan (75%, 1 361-den 1 014) oblystarynda baıqalyp otyr», - Q. Óskenbaev.

Budan bólek, ol avtonomdy qazandyqtardyń daıyndyǵyna toqtaldy. Jergilikti atqarýshy organdar 11 435 avtonomdy qazandyqty jóndeýdi josparlaǵan. Onyń ishinde 11 074 qazandyq nemese 97%-y daıyndaldy. Basqa óńirlermen salystyrǵanda Abaı (73%, 273-ten 199), Qaraǵandy (85%, 623-ten 532), Jambyl (90%, 565-ten 508) oblystarynda daıyndyq jumystary tómen deńgeıde júrgizilip jatyr.

«Jylý jelilerin daıyndaýǵa qatysty aıtatyn bolsaq, josparlanǵan 1 249 shaqyrym jylý jelileriniń 1 176 shaqyrymy nemese 94%-y jóndeldi. Alaıda, Abaı, Túrkistan, Jetisý oblystarynda jóndeý jumystary baıaý júrgizilip otyr», - dep naqtylady mınıstr.

Onyń sózine qaraǵanda, 2 353 shaqyrym sýmen jabdyqtaý jáne sý burý jelileriniń 2 031 shaqyrymy nemese 86%-y jóndeldi. Sýmen jabdyqtaý nysandaryn daıyndaý boıynsha tómen kórsetkishter Túrkistan, Almaty jáne Aqmola oblystarynda tirkeldi.

«Ákimdikter jylý berý maýsymyna ınjenerlik ınfraqurylymdy, áleýmettik sala obektilerin jáne turǵyn úılerdi ýaqytyly ári sapaly daıyndaý boıynsha tıisti sharalardy kúsheıtýi qajet», - dedi vedomstvo basshysy.

Budan buryn habarlanǵandaı, jyly berý maýsymyna qaı óńirlerde bilim berý men densaýlyq saqtaý nysandarynyń daıyndyǵy tómen ekeni aıtyldy.