Elimizde jyl saıyn 4,5 mln tonna qoqys qaldyǵy shyǵarylady

NUR-SULTAN. QazAqparat – Jyl saıyn Qazaqstanda 4,5 mln tonna qaldyq shyǵarylady. Muny eldegi ekologııalyq jaǵdaı týraly baıandaǵan Ekologııa vıtse-mınıstri Zúlfııa Súleımenova aıtty, dep habarlaıdy QazAqparat tilshisi.

«Jyl saıyn 4,5 mln tonna qaldyq shyǵarylady. Byltyr 4,2 mln tonna qoqys tógildi. Onyń 21,1% qaıta óńdeldi. Bıyl bul kórsetkish 24%-ǵa jetedi dep josparlap otyrmyz. Oń dınamıka baıqalǵanymen, jetispeı jatqan tustar da bar. Máselen, qoqys keıbir aımaqtarda kóp, keıbir aımaqtarda óte az óńdeledi», - dep málim etti Zúlfııa Súleımenova.

Vıtse-mınıstr aqparatyna saı, endi vedomstvo qaýipti qaldyqtardy óńdeý jáne olardy joıýmen aınalysatyn kompanııalardyń jumysyna baqylaý júrgizetin bolady.

«Ekologııalyq kodekske ózgeris engizý týraly sheshim mańyzdy boldy. Sebebi biz bul ýaqytqa deıin naryqta qoqys shyǵarý, óńdeý jáne suryptaýmen aınalysatyn bıznes sýbektilerin bilmeıtin edik. Endi shaǵyn kásiporyndar qaldyqtardy shyǵaratyn bolsa, onda ony qaı jerge tógetini týraly bizge habarlama beredi. Buryn belgilenbegen oryndarǵa qoqys tógý faktileri kóp tirkelgen edi. Máselen, byltyr 7 myńnan astam ruqsat etilmegen qaldyqtardy tógý orny anyqtaldy. Onyń 89% joıyldy. Al bıyl mamyr aıynan bastap 1,5 myńǵa jýyq ruqsat etilmegen úıindiler anyqtaldy», dedi Zúlfııa Súleımenova.

Búginde asa qaýipti qaldyqtardy joıýmen aınalysatyn 60-qa jýyq kompanııa lıtsenzııa alǵan. Al jalpy qoqysty shyǵarý, óńdeý jáne suryptaý qyzmetin kórsetetin 990-nan astam bıznes sýbektisi bar.