Elimizde jyl saıyn 37 myń adamnan qaterli isik derti anyqtalady
Densaýlyq saqtaý mınıstrliginiń málimetinshe, búginde respýblıkada onkologııalyq aýrýlarmen aýyratyn 205 myńnan astam naýqas dınamıkalyq baqylaýda bolsa, jyl saıyn 37 myń jańa jaǵdaı anyqtalady. Qaterli isikten bolatyn ólim-jitim qanaınalym júıesi aýrýlarynan keıin ekinshi orynda.
Ázirlengen Keshendi jospar onkologııalyq aýrýlarmen aýyratyn naýqastarǵa kómek kórsetýdiń qoljetimdiligi men sapasyn arttyrýǵa baǵyttalǵan. Ony qarjylandyrý memlekettik bıýdjet pen «Qazaqstan halqyna» qoǵamdyq qorynyń qarajaty esebinen júzege asyrylady. Osylaısha, QR Prezıdentiniń bastamasymen qurylǵan qor jyl saıyn 50 mlrd teńgeden astam qarjy bóledi dep josparlanyp otyr. Bul qarajat joǵary tehnologııalyq sáýlelik jabdyqtardy satyp alýǵa jáne onkologııalyq ortalyqtardy jaraqtandyrýǵa, isikke qarsy preparattarǵa tapsyrys berýge, mamandardy shetelde oqytýǵa jáne basqa da maqsattarǵa jumsalady.
Atap aıtqanda, elimizdiń barlyq óńirleri úshin onkologııalyq aýrýlardy emdeýde eń tıimdi zamanaýı 17 jelilik údetkishti satyp alý máselesi qarastyrylyp jatyr. Sonymen qatar, kishigirim isikterdiń ózin jáne alys ornalasqan metastazany anyqtaı alatyn pozıtrondy emıssııalyq tomografııa (PET KT) apparaty satyp alynady.
«Óńirlik onkologııalyq ortalyqtarǵa satyp alynatyn joǵary tehnologııalyq jabdyqtardyń kómegimen oblys turǵyndary úshin sapaly medıtsınalyq kómek qoljetimdi bolady. Tekserý men emdelý úshin elordaǵa nemese basqa da iri qalalarǵa barýdyń qajettiligi aıtarlyqtaı qysqarady», - dedi Altaı Kólginov.
Premer-Mınıstrdiń orynbasary Onkologııalyq aýrýlarmen kúrestiń keshendi josparyn qysqa merzimde bekitip, osy jyldyń III-IV toqsanynda qural-jabdyqtardy satyp alý qajettigin atap ótti.
