Elimizde jyl saıyn 1 mlrd tonna óndiristik qaldyq shyǵarylady
NUR-SULTAN. QazAqparat – Qazaqstanda shyǵarylatyn qaldyqtardyń 18 paıyzy ǵana óńdeýge jiberiledi. Qalǵany polıgondarǵa kómilip otyr. Bul týraly Qazaqstandaǵy BUU Damý baǵdarlamasynyń turaqty ókiliniń orynbasary Vıtalıı Vremısh aıtty, dep habarlaıdy QazAqparat.
«BUU bıyl ǵana Qazaqstanda jańa baǵdarlama boıynsha áriptestikti bastady. 2025 jylǵa deıin josparlanǵan baǵdarlamaǵa qorshaǵan ortany qorǵaýǵa arnalǵan basym baǵyttardyń bári enip otyr. Sońǵy 15 jylda BUU qoldaýymen elde 200-den astam joba iske asyryldy. Jyl saıyn Qazaqstanda úlken kólemdegi qatty turmystyq qaldyq qordalanady.
«Jyl saıyn Qazaqstanda 4,5-5 mln tonna qatty turmystyq qaldyq jáne 1 mlrd tonnaǵa jýyq ónerkásiptik qaldyq túziledi. Qatty turmystyq qaldyqtardyń 80%-dan astamy polıgondarǵa jóneltiledi. Sonyń tek 18%-y qaıta óńdeledi. Ol polıgondardyń kóbi stardartqa saı emes. Memleket bul problemany sheshý úshin qaldyqtarmen jumys isteýde «jasyl» saıasatty qalyptastyrýǵa jáne nyǵaıtýǵa baǵyt aldy», - dedi BUU ókili Green energy & Waste recycling forum atty jańartylatyn energııa jáne qaldyqtardy qaıta óńdeý jónindegi 5-shi eýrazııalyq bıznes-forýmynda.
Sondaı-aq, ol búgin kúshine engen Ekologııalyq kodekstiń jańa redaktsııasy Qazaqstannyń jasyl ekonomıkaǵa kóshý jónindegi ulttyq maqsattarǵa qol jetkizýine múmkindik ashatynyna senim bildirdi.
