Elimizde jyl basynan jol apatynan 90 bala qaza taýyp, 1 860 bala jaraqattandy
«Balalardyń joldaǵy qaýipsizdigi - mańyzdy jáne ózekti taqyryp. Ókinishke qaraı, respýblıkadaǵy árbir tórtinshi jol-kólik oqıǵasy kámeletke tolmaǵandardyń qatysýymen jasalady. Jyl basynan beri osyndaı jol-kólik oqıǵalarynan 90 bala qaza taýyp, 1 860 bala jaraqat aldy. Pandemııa jáne halyqty áleýmettik oqshaýlaý kezeńinde, oqýshylardyń kópshiligi qashyqtan oqytý formatqa kóshirilgen kezde, jas urpaq arasynda bilim berý jáne quqyqtyq túsindirý jumysynyń kólemi de tómendedi. Osyǵan baılanysty 23 tamyzdan bastap oqý jylynyń bastalýy qarsańynda Іshki ister mınıstrligi «Nazar aýdaryńyz - balalar!» is-sharasyn uıymdastyrýda», - dedi Nurdildá Oraz.
Resmı ókildiń aıtýynsha, atalǵan is-shara 2 kezeńnen, naqty aıtqanda daıyndyq jáne negizgi kezeńnen turady.
«Daıyndyq kezeńi aıasynda: bilim berý mekemeleriniń aýmaǵyna irgeles jerlerde kóshe-jol jelisiniń jáne jol qozǵalysyn uıymdastyrýdyń tehnıkalyq quraldarynyń jaı-kúıin zertteý; ata-analarmen jáne muǵalimdermen jol qozǵalysy qaýipsizdigi taqyrybynda profılaktıkalyq sabaq, dáris ótkizý josparlanǵan», - dedi ol.
Onyń atap ótýinshe, negizgi kezeń balalarmen tikeleı júrgiziledi. Ol jol qozǵalysy qaýipsizdigin nasıhattaýǵa jáne balalardyń jol-kólik jaraqattanýynyń aldyn alýǵa baǵyttalǵan is-sharalardy qamtıdy.
«Budan basqa, osy jyldyń 1 qyrkúıeginen bastap oqý oryndaryna irgeles jerlerde polıtsııa jasaǵy ulǵaıtylady. Balalardyń joldardaǵy qaýipsizdigi kóp jaǵdaıda ata-analarǵa baılanysty ekenin atap ótken jón. Jol erejesin saqtańyz jáne balalardy qorǵańyz!», - dedi Nurdildá Oraz.