Elimizde jyl basynan 34 bala sýǵa ketti

NUR-SULTAN. QazAqparat – Elimizde jyl basynan beri 34 bala sýǵa tunshyǵyp mert boldy. Bul týraly QR TJM Azamattyq qorǵanys jáne áskerı bólimder komıtetiniń tóraǵasy Baýyrjan Syzdyqov aıtty, dep habarlaıdy QazAqparat tilshisi.

«Qabyldanǵan is-sharalarǵa qaramastan jyl basynan beri balalardy qaraýsyz qaldyrý kesirinen, belgilenbegen jerde sýǵa túsýdiń saldarynan 34 bala qaza tapty. Jalpy, jyl basnan beri Tótenshe jaǵdaılar mınıstrliginiń mamandary 48adamdy, onyń ishinde 6 balany qutqardy», - dedi komıtet tóraǵasy Ortalyq kommýnıkatsııalar qyzmetindegi baspasóz máslıhaty barysynda.

Komıtet basshysynyń dereginshe, elimizde sýǵa túsýge arnalǵan 469 oryn bar. Onyń 118-i kommýnaldyq jáne 275-si jekemenshik jaǵajaı sanalady. Aıta keterligi, jyl basynan beri Tótenshe jaǵdaılar mınıstrligi ortalyq jáne jergilikti atqarýshy organdarmen birlesip, sý qoınaýlarynda oryn alatyn tótenshe oqıǵalar táýekelin tómendetýge baǵyttalǵan keshendi is-sharalardy qolǵa alyp, der ýaqytynda júrgizip jatyr. Máselen, 31 naýryzda Tótenshe jaǵdaılar mınıstriniń buıryǵymen barlyq deńgeıdegi ákimdikter men memlekettik organdardyń mindeti aıqyndalǵan. Shomylý maýsymyn ótkizýge ortalyq jáne jergilikti atqarýshy organdardyń daıyndyq máseleleri jónindegi vedomstvoaralyq memlekettik komıssııanyń otyrysy ótkizilgen.

«Óńirlerde sýdaǵy qaýipsizdikti qamtamasyz etý máseleleri barlyq deńgeıdegi tótenshe jaǵdaılar jónindegi komıssııalardyń otyrysynda qaraldy», - dedi Baýyrjan Syzdyqov.