Elimizde júrgizýshi kýáligine qatysty qyzmet sany artty
NUR-SULTAN. QazAqparat – Pandemııaǵa qaramastan, avtoHQKO qyzmetine degen suranys saıabyrlamaı tur. Elimizde jyl basynan beri avtoHQKO-da 1,7 mıllıonǵa jýyq memlekettik qyzmet kórsetildi. Bul týraly «Azamattarǵa arnalǵan úkimet» KEAQ baspasóz qyzmetinen málim boldy, dep habarlaıdy QazAqparat.
«Azamattarǵa arnalǵan úkimettiń» resmı málimetine sáıkes, bıylǵy jeti aı ishinde Qazaqstanda júrgizýshi kýáligin berý jáne aýystyrý boıynsha 400 myńnan astam qyzmet, al kólikti tirkeý boıynsha 1,3 mıllıon memlekettik qyzmet usynylǵan.
«Azamattarǵa arnalǵan úkimet» memlekettik korporatsııasynyń tóraǵasy Ásemgúl Baltashevanyń aıtýynsha, byltyrǵy jylǵa qaraǵanda bıyl egov.kz arqyly alynǵan onlaın qyzmetterdiń sany artqan.
«Bul úrdis azamattardyń tsıfrlyq saýattylyǵyn arttyrýǵa oń áserin tıgizgeni anyq. Máselen, bıyl elektrondyq portal arqyly 145 myńnan astam adam júrgizýshi kýáligin aýystyrsa, 90 myńǵa jýyq kisi kólikterin onlaın túrde qaıta tirkegen», - dedi ol.
Jarııalanǵan tótenshe jaǵdaı men karantındik shekteýlerge, sonyń ishinde halyqqa qyzmet kórsetý ortalyqtarynyń jumys ýaqyty qysqarǵanyna qaramastan, qazaqstandyqtardyń avtokólikke qatysty qyzmetterge degen suranysy óte joǵary. Aıta ketsek, bıyl júrgizýshi kýáligine qatysty qyzmetterdiń sany byltyrǵy jylǵa qaraǵanda 70 myńǵa ósken, al kólikti qaıta tirkeý boıynsha qyzmet nebary 150 myńǵa qysqardy.
