Elimizde jumysyn toqtatqan 2 banktiń salymshylaryna aqshalary qaıtarylýda

ASTANA. QazAqparat - Agent bank esebindegi «Bank TsentrKredıt» AQ aldaǵy ýaqytta «Delta Bank» pen «Qazınvestbank»  salymshylaryna ótemdi Qazaqstannyń depozıtterge kepildik berý qory (QDKBQ) qarajaty esebinen tóleýdi júzege asyrady, dep habarlaıdy QazAqparat QDKBQ baspasóz qyzmetine silteme jasap.

Málim bolǵandaı, «Delta Bank» salymshylaryna tóleý 2018 jyldyń 17 mamyrynan bastap júrgizilýde. Tólem júrgizý jarty jyl ishinde 2018 jyldyń 17 qarashasyna deıin ótkiziledi. Al «Qazınvestbank» salymshylaryna 2018 jyldyń 13 tamyzyna deıin tóleý júrgiziledi. Tólem «Bank TsentrKredıt» AQ agent bankiniń barlyq fılıaldarynyń jelisi arqyly júzege asyrylady.

«Qazirgi ýaqytta «Delta Bank» salymshylaryna 40,9 mıllıon teńge tólendi (barlyq mindettemelerdiń 28,9%). Ony 52 salymshy aldy. QDKBQ-nyń kepildik berilgen ótemdi tóleý boıynsha mindettemeleriniń somasy shamamen 141 mıllıon teńgeni quraıdy. Ótemdi alýǵa quqyǵy bar «Delta Bank» AQ jeke tulǵalardyń sany - 2 244. Qordyń 2 192 salymshy aldyndaǵy qalǵan mindettemeleri 100,6 mıllıon teńgeni quraıdy», - delingen habarlamada.

Ótemdi sondaı-aq, Qazınvestbanktiń 8 salymshysy alǵan. 87,6 paıyzdyq jalpy mindettemelerdiń 1,8 mıllıon teńgesi tólenip qoıǵan.

Tólem QDKBQ arnaıy rezervi qarajatynan júzege asyrylady. Qazirgi ýaqytta kepildik berilgen ótemdi tóleýge arnalǵan qarajat somasy 608 mıllıard teńgeni quraıdy.

«Biz «Delta Bank» AQ salymshylarynyń shaǵyn belsendiligine nazar aýdaramyz: jalpy mindettemelerdiń 71,1% talap etilmeıdi, - dep túsindiredi QDKBQ tóraǵasy Baqyt Qoǵylov. - 1 388 salymshynyń (61,9 paıyz) 5 myń teńgeden az depozıtteri bar. Ortasha salymy 52 myń teńgeni quraıtyn 1 126 salymshy bar (50 paıyz). 22 salymshynyń qarajaty (1%) - bir mıllıon teńgeden astam. «Bank TsentrKredıt» AQ agent bankiniń «Qazınvestbank» AQ, «Delta Bank» AQ salymshylarymen esep aıyrysý merzimi - alty aı. Biz eki banktiń salymshylarynan ózderiniń quqyqtaryn paıdalanyp, depozıtter boıynsha ótemdi agent bankten alýyn suraımyz. Osy kórsetilgen merzimnen keıin tikeleı Almaty qalasyndaǵy Qordyń keńsesine senimhat arqyly nemese qujattardy poshta arqyly jiberý qajet».

Bank salymshylaryna jedel keńes berý úshin, QDKBQ «KDIF | Suraqtar men jaýaptar» atty Telegram messendjerinde chatty iske qosty. Onda bankterdiń salymshylary QDKBQ sarapshylarynan depozıtterge kepildik berý týraly, ótem tóleý erejeleri boıynsha suraqtar qoıýy múmkin. Sonymen qatar, Telegram kanalyna @KDIF_info (www.t.me/KDIF_info) iske qosylady. Onda suraq-jaýap formasynda kepildik berilgen ótemdi tóleý týraly naqty aqparat jáne kepildik týraly jalpy aqparat jarııalanatyn bolady.

 «2017-2018 jyldary kúshine engen eń eleýli trendterdiń biri - jańalyqty jetkizý men aqparat almasý tásili retinde messendjerdi paıdalaný. Problemaly bankterdiń salymshylaryna aqparattyq qoldaý kórsetýdi jyldamdatý maqsatynda, biz Telegram kanalynda onlaın-keńes berý sııaqty qosymsha múmkindikti paıdalanamyz», - dedi QDKBQ tóraǵasy.

Eske sala ketsek, budan buryn «Delta Bank» AQ qyzmetin májbúrlep toqtatý týraly sot sheshimi zańdy kúshine engenin habarlaǵan bolatynbyz.