Elimizde jumyspen qamtý sharalary tolyq tsıfrlandyrylǵan

NUR-SULTAN. QazAqparat – Bıylǵy 7 aıdyń qorytyndysy boıynsha 296 myń adam jumysqa ornalasty. Bul týraly QR Eńbek jáne halyqty áleýmettik qorǵaý mınıstri Tamara Dúısenova Úkimet otyrysynda aıtty, dep habarlaıdy QazAqparat tilshisi.

Tamara Dúısenova halyqtyń tabysyn arttyrýdyń negizgi sharty – sapaly jumys oryndary ekenin atap ótti.

«Bıylǵy 7 aıdyń qorytyndysy boıynsha 296 myń adam jumysqa ornalasty. Onyń ishinde 153 myń adam nemese 52% jumys berýshiler usynǵan bos oryndarǵa ornalassa, 122 myńy memleket tarapynan sýbsıdııalanatyn jumys oryndaryna, 20 myńy – ulttyq jobalar sheńberinde eńbekpen qamtyldy. Jalpy jumyspen qamtylǵan azamattardyń 55 paıyzy nemese 163 myńy turaqty jumys oryndaryna ıe boldy», – dedi Tamara Dúısenova.

Jumyspen qamtý sharalary tolyq tsıfrlandyryldy. Búginde óńirlerde atqarylyp jatqan jumystar monıtorıngi elektrondy formatta júrigizlýde.

«Jumysqa ornalastyrý jónindegi óńirlerdiń málimeti mindetti zeınetaqy jarnalary túsimderi negizinde saraptalýda. Zeınetaqy jarnalary túsimi memleket tarapynan sýbsıdııalanatyn jumys oryndaryna jiberilgender úshin 81%, jumys berýshiler usynǵan bos oryndaryna ornalasqandar boıynsha – 65%-dy qurap otyr. Al ulttyq jobalar aıasynda jumysqa ornalasqan 20 myń adamnyń tek 38%-da ǵana zeınetaqy jarnasy bar. Bul baǵyttaǵy eń tómengi kórsetkish 2,4% - Mańǵystaý oblysyna, 9,2% - Batys Qazaqstan oblysyna, 18,5% - Shyǵys Qazaqstan oblysyna tıesili bolyp otyr. Sondyqtan, oblys jáne qala ákimderi basty nazardy ulttyq joba aıasynda ashylyp jatqan jumys oryndarynyń azdyǵyna jáne zeınetaqy jarnalary túsiminiń tómendigine aýdarýy qajet dep sanaımyz», - dedi Tamara Dúısenova.

Buǵan deıin Eńbek mınıstri jumys kúshi tapshy óńirlerge myńnan astam otbasy qonys aýdarǵanyn aıtqan edi.