Elimizde jumys jasap jatqan birqatar jer qoınaýyn paıdalanýshy kompanııalardy qol suǵylmaýshylyq aımaǵynan shyǵarý qajet - K. Saǵadıev
ASTANA. Qańtardyń 26-sy. QazAqparat /Qanat Mámetqazyuly/ - Elimizde jumys jasap jatqan birqatar jer qoınaýyn paıdalanýshy kompanııalardy qol suǵylmaýshylyq aımaǵynan shyǵarý qajet. Búgin QR Parlamenti Májilisinde «Jer qoınaýy men jer qoınaýyn paıdalaný týraly» zań jobasyn talqylaý barysynda depýtat Kenjeǵalı Saǵadıev osylaı málim etti,
dep habarlaıdy QazAqparat.
«Atalǵan zań jobasy boıynsha biz alǵash ret memlekettiń saıası erik-jigerin anyq ári ashyq qamtyp otyrmyz. Zań jobasynda ındýstrııalyq saıasatqa, qazaqstandyq qamtý baǵdarlamalaryn sheteldik kompanııalar boıynsha da júzege asyrý joldary kórinis taýyp otyr. Endeshe, osy máselege qatysty sheteldik ınvestorlardyń múddeliligi tanylmasa, onda qazaqstandyq tarap ta tıisti áreketke barýy shart, tipti jer qoınaýyn paıdalanýǵa qatysty basqa ınvestorlardy qarastyrý joldaryn kózdegeni oryndy. Sol úshin Qazaqstan aldaǵy ýaqytta shıkizattyq sektordy tereń óńdeýge qyzyǵýshylyq tanytyp, naqty jobalar usynǵan kompanııalarmen jumys jasaýǵa kóshýi kerek. Bunyń ózi jer qoınaýyn paıdalaný salasyndaǵy kompanııalar elimizdiń damýyna qatysty jobalardy qosa júrgizbese, biz jańa áriptestirdi izdeıtin bolamyz degen sóz. Onyń ústine, Memleket basshysy jaqynda Úkimettiń jumys qorytyndysy barysynda «jer qoınaýyn paıdalanýshylarmen erterekte qabyldanǵan kelisimsharttardyń eskirgen tártibi boıynsha ómir súre almaımyz» degen bolatyn. Sondyqtan da, elimizde jumys jasap jatqan birqatar jer qoınaýyn paıdalanýshy kompanııalardy qol suǵylmaýshylyq aımaǵynan shyǵarý qajet», dedi K. Saǵadıev.
«Osylaısha, elimizdegi barlyq jer qoınaýyn paıdalanýshy kompanııalar qazaqstandyq salyq zańnamasyndaǵy ózgerister boıynsha jumys jasaýy tıis. Dál osyndaı talapty biz birneshe jyl boıy kóterip kelemiz», dedi ol.
