Elimizde JOO-ǵa túsýdiń zańsyz ádisteri anyqtaldy

KÓKShETAÝ. QazAqparat - Aqmola oblysy boıynsha Memlekettik qyzmet isteri jáne sybaılas jemqorlyqqa qarsy is-qımyl departamenti men arnaıy monıtorıngtik top (AMT) óńirdegi JOO-ǵa qatysty birqatar zań buzýshylyqtardy anyqtady, dep habarlaıdy QazAqparat tilshisi.

Vedomstvonyń málimeti boıynsha, shara barysynda arnaıy monıtorıngtik top músheleri bakalavrıat pen magıstratýraǵa túsýdiń jańa zańsyz múmkindikterin anyqtady.

Monıtorıng barysynda 11 synyptan keıin bakalavrıatqa keshendi testileýden ótpeı túsýge bolatyny anyqtaldy. Talapker bar bolǵany shyǵarmashylyq mamandyqqa túsip, ári qaraı esh qıyndyqsyz basqa qalaǵan mamandyqqa aýysýyna bolady. Atalǵan ádis JOO túsý boıynsha barlyq bógetterden ótýge múmkindik beredi.

«Magıstratýraǵa túsken kezde aldyn ala kelisim boıynsha uıaly qurylǵylarǵa ornatylǵan «What's App» messendjeri arqyly kómek kórsetýge kepildik beriledi», - dedi komıssııasynyń múshesi.

Sonymen qatar, AMT músheleri bakalavrıat pen magıstratýraǵa reseılik JOO arqyly túsýdiń joldaryn anyqtady. Atalǵan ádis bakalavrıatqa UBT men KT tapsyrýsyz túsýge múmkindik beredi. Oqytý men emtıhan tapsyrý úrdisteri qazaqstandyq JOO-da ótedi. Birinshi jartyjyldyq ishinde oqý aqysy shamamen160 myń teńgeni quraıdy.

Oǵan qosa, stýdentterdiń emtıhandardy (sessııany) tapsyrýsyz baǵa alýynyń sybaılas jemqorlyq boıynsha táýekelderi anyqtaldy. Tipti arnaıy jasyryn baǵalar tizimi de bar: dıssertatsııany jazý jáne qorǵaý - 120 myń teńge, sessııa tapsyrý - 60 myń teńgeden kem emes.

«Anyqtalǵan faktiler júıelik sıpatqa ıe jáne talapkerlerge oblystyń joǵarǵy oqý oryndaryna esh bógetsiz, mindetti talaptardy eskermeı-aq oqýǵa túsýine jol ashatyn joǵarǵy bilim júıesindegi sybaılas jemqorlyq táýekelderiniń bolýyn rastaıdy»,- delingen habarlamada.