Elimizde joldy kútip, baptaýda qandaı mamandar jetispeıdi
NUR-SULTAN. QazAqparat – Qazaqstanda tasjoldardy jóndeý jáne kútip, baptaý boıynsha jetispeıtin sala mamandary belgili boldy, dep habarlaıdy QazAqparat tilshisi.
«Búginde elimizde 11 aqyly jol ýchaskesi bar. Onyń ishinde 2 aqyly jol ýchaskesin ulttyq kompanııa óz qarjysy esebinen kútip, baptaıdy. Qalǵan ýchaskeler boıynsha aqyly joldardan túsken tabystyń esebinen kútim jumystary júrgiziledi. Joldy kútip baptaýǵa tek jóndeý jumysy ǵana emes, sonymen qatar jol boıyndaǵy ınfraqurylymdy damytý da jatady. Búginde aqyly joldar boıynda ájethana, qoqys konteınerleri, janar-jaǵar maı quıý beketteri jáne demalys oryndarymen qamtylǵan», - dedi «QazAvtoJol» ulttyq kompanııasynyń aqyly joldar dırektsııasynyń bas ınjeneri Qanat Sádýaqasov BAQ ókilderine arnalǵan baspasóz týry barysynda.
Onyń aıtýynsha, aqyly joldardyń sapasy men ınfraqurylymy jyl sanap damı túspek.
«Bizdiń kompanııada aqyly joldardaǵy qozǵalysty qadaǵalap, qamtyp otyratyn arnaıy bólimshe jumys isteıdi. Sonymen qatar jolaýshylar tarapynan qandaı da bir saýal, ótinish, shaǵym bolǵan jaǵdaıda 1403 Call-ortalyǵy táýlik boıy jumys istep tur. Qazirgi ýaqytta aqyly joldardy kútip baptaýǵa arnalǵan 150 tehnıka bar. Onyń ishinde 130-y arnaıy tehnıka. Tehnıkamen qamtý jaǵynan biz normatıvti oryndap, standartqa saı jumys istep jatyrmyz. Eger jetispeı jatqan jaǵdaıda biz qosymsha tehnıka jaldaımyz.
Kadr máselesine kelsek, sheshilýi tıis tustary bar. Aıtar bolsaq, júrgizýshi, mehanızator mamandarynyń jetispeýshiligi bar. Degenmen bul sheshimi bar másele. Kadr tapshylyǵyn sheshýde jergilikti atqarýshy organdarmen de tyǵyz baılanystamyz», - deıdi ol.
